Հանգստյան օրերին մի շարք հայկական թիմեր ընկերական հանդիպումներ անցկացրին:
Թուրքիայում ուսումնամարզական հավաք անցկացնող «Գանձասար»-ը հանդիպեց Սամարայի «Կռիլյա Սովետով»-ի երիտասարդական թիմի հետ։
Կապանի թիմը խոշոր` 4։0 հաշվով պարտության մատնեց մրցակցին։ Դուբլի հեղինակ դարձավ Արթուր Քոչարյան (28 րոպ. և 55 րոպ.), մեկական անգամ էլ աչքի ընկան Արսեն Ավետիսյանն (41 րոպ.) ու Սարգիս Մովսիսյանը (88 րոպ.)։
Նշենք, որ Աբրահամ Խաշմանյանի սաները հաջորդ հանդիպումը կանցկացնեն փետրվարի 16-ին։
Հայկական մյուս 4 թիմերը պարտություն կրեցին: Անթալիայում ուսումնամարզական հավաք անցկացնող «Բանանց»-ը 2:1 հաշվով զիջեց Ռումինիայի բարձրագույն խմբի ներկայացուցիչ «Գլորիա Բիստրիցա»-ին։ Հայկական ակումբի կազմում գոլի հեղինակ դարձավ Խաչատուր Ավետիսյանը:
Գյումրիի «Շիրակ»-ը թուրքական Բելեք քաղաքում ուժերը չափեց Բելառուսի առաջնության ուժեղագույն թիմերից մեկի` Բրեստի «Դինամո»-ի հետ և պարտվեց 2:1 հաշվով:
Դարձյալ Թուրքիայում գտնվող «Ուլիս»-ն ու «Միկա»-ն խոշոր հաշվով պարտություններ կրեցին: Արմեն Շահգելդյանի սաները 3:0 հաշվով զիջեցին չեխական «Վիկտորիա»-ին, իսկ Սևադա Արզումանյանի «Ուլիս»-ը 4:0 հաշվով պարտվեց Սանկտ Պետերբուրգի «Զենիթ»-ի փոխարինողների կազմից:
