Հանգստյան օրերին կայացան Իսպանիայի առաջնության 23-րդ տուրի հանդիպումները: Ամենաանակնկալ արդյունքը գրանցվեց «Սպորտինգ»-»Բարսելոնա» խաղում. Խիխոնցիներին հաջողվեց ընդհատել կատալոնական ակումբի ռեկորդային հաղթանակների սերիան:
«Սպորտինգ»-ի ֆուտբոլիստներն արդեն խաղասկզբից ցույց տվեցին, որ չեն պատրաստվում խաղը նվիրել անվանի մրցակցին: Նրանք պայքարում էին յուրաքանչյուր գնդակի համար և ժամանակ առ ժամանակ պրեսինգի էին դիմում անգամ մրցակցի կիսադաշտում: «Բարսելոնա»-ն, որ հանդես էր գալիս առանց մի քանի առաջատար ֆուտբոլիստների, սովորության համաձայն աշխատում էր շատ գնդակ պահել և արագության ու վարպետության շնորհիվ առավելություն ստանալ:
16-րդ րոպեին տանտերերի հակագրոհներից մեկն ավարտվեց դարպասի գրավումով. Դավիդ Բարալը վարպետորեն շրջանցեց մի քանի պաշտպանի և գերազանց հարվածով բացեց խաղի հաշիվը: Գվարդիոլայի սաները, կարծես չհավատալով կատարվածին, երկար ժամանակ ուշքի չէին գալիս, և միայն երկրորդ խաղակեսում նրանք վերջնականապես կարողացան հանդիպման ղեկը վերցնել իրենց ձեռքը:
Չնայած ամբողջ երկրորդ խաղակեսն անցավ կատալոնական ակումբի բացահայտ առավելությամբ, բայց նրանց բազմաթիվ հարվածները կամ շեղ էին ստացվում կամ ետ էին մղվում Կուելյարի կողմից: Միայն 80-րդ րոպեին Դավիդ Վիլյաին հաջողվեց հավասարեցնել հաշիվը: Իսպանացի ռմբարկուն նկատեց, որ դարպասապահը մի փոքր առաջ է եկել և գնդակը նրա գլխի վրայով վարպետորեն նետեց դարպասը:
Հանդիպման մնացած հատվածն անցավ նույն սցենարով և նոր գոլեր չգրանցվեցին` «Սպորտինգ»-»Բարսելոնա»` 1:1:
Մադրիդի «Ռեալ»-ը չկորցրեց իր հնարավորությունը և մեծ դժվարությամբ հաղթելով «Էսպանյոլ»-ին միավորների տարբերությունը «Բարսելոնա»-ից կրճատեց 5-ի: Հանդիպման երկրորդ րոպեից Մոուրինյոյի սաները մնացին 10 հոգով:
Իկեր Կասիլիասը` փորձելով կանխել Կալեխոնի առաջխաղացումը դուրս եկավ տուգանային հրապարակի սահմաններից և կանոնները խախտեց կանոններն ու արդարացիորեն հեռացվեց խաղադաշտից: Ինչպես պարզվեց, սա «Ռեալ»-ի պատմության ամենաարագ կարմիր քարտն էր:
Այնուամենայնիվ, «արքայական» ակումբին հաջողվեց թեկուզ 10 հոգով, բայց հավասար պայքար մղել մրցակցի հետ: Իսկ 24-րդ րոպեին Մարսելոյի խփած միակ գոլը հաղթանակ բերեց մադրիդցիներին:
Մյուս հանդիպումներում գրանցվեցին հետևյալ արդյունքները` «Ատլետիկո Մադրիդ»-«Վալենսիա»` 1:2, «Ռասինգ»-«Սևիլիա»` 3:2, «Հերկուլես»-«Սարագոսա»` 2:1, «Լևանտե»-«Ալմերիա»` 1:0, «Մալագա»- «Խետաֆե»` 2:2, «Ռեալ Սոսյեդադ»-«Օսասունա»` 1:0, «Դեպորտիվո»-«Վիլյառեալ»` 1:0:
Իսկ «Մալյորկա»-«Ատլետիկ Բիլբաո» հանդիպումը կկայանա այսօր:
