Թուրքիայի իշխող «Արդարություն եւ զարգացում» կուսակցության Բալքեսիրի նահանգային կառույցի ղեկավարը եւ ղեկավար խորհրդի եւս 85 անդամներ հրաժարական են ներկայացրել եւ դուրս եկել կուսակցությունից:
Թուրքական Internethaber-ի փոխանցմամբ` կուսակցության Բալքեսիրի նահանգային կառույցի ղեկավար Մահմուդ Փոյրազլըն նշել է, թե իրենք հրաժարական են տալիս, քանի որ կարծում են, որ այլեւս օգուտ չեն տալիս իրենց կուսակցությանը: «2011-ի ընտրությունների մոտենալուն զուգահեռ՝ կուսակցության ներսում՝ տարբեր խմբերի միջեւ, թեժանում են ներքին «հաշիվները»: Ես նախընտրում եմ մի կողմ քաշվել»,-նշել է Մահմուդ Փոյրազլըն:
Բալքեսիրում նախորդ տարի անցկացված տեղական ինքնակառավարման մարմինների ընտրություններում քաղաքապետ դարձավ ընդդիմադիր «Ազգայնական շարժում» կուսակցության ներկայացուցիչը, իսկ այս տարվա Սահմանադրական բարեփոխումների հանրաքվեի ընթացքում այս նահանգում իշխող կուսակցությունը եւս պարտություն կրեց, քանի որ «այո» քվեարկածները զգալիորեն զիջեցին «ոչ» քվեարկածներին: