«Երիտասարդ համալսարանականների միավորում» ՀԿ նախագահ Գևորգ Մելքոնյանը այսօր ամփոփեց կազմակերպության անցյալ տարվա իրականացրած ծրագրերը: Մելքոնյանը հրաժարվեց ասել բարեգործության համար տրամադրված կոնկրետ գումարը, միայն ասաց, որ ՀԿ-ին աջակցում են Սերժ Սարգսյանի եղբայր Լևոն Սարգսյանի «Փյունիկ» հիմնադրամը և ԵՊՀ ռեկտոր Արամ Սիմոնյանը՝ իր անձնական բյուջեից:
«Երիտասարդ համալսարանականները» անցյալ տարի իրագործել են ռազմահայրենասիրական և բնապահպանական ծրագրեր:
«Գնում ենք բանակ» ծրագրի շրջանակներում շուրջ 2,000 համալսարանականներ մասնակցել են դեպի Եռաբլուր երթին, ինչպես նաև հանդիպել են Պաշտպանության նախարար Սեյրան Օհանյանի հետ,- կարևորեց Մելքոնյանը:
ՀԿ նախագահի խոսքով, ինքը վաղուց ՀՀԿ անդամ է, և ՀԿ-ն համագործակցում է այդ կուսակցության հետ, սակայն կազմակերպության գործունեությունը որոշվում է նրա խորհրդի կողմից:
«Մենք միայն հայրենասիրական նպատակ ենք հետապնդում, նրանք, ովքեր կարիերա են ուզում ստեղծել, այսպիսի գործունեությամբ չեն զբաղվում: Մեր կազմակերպության մեջ կան ասպիրանտներ և մագիստրոսներ, ովքեր բանակ չեն գնացել,սակայն մնացած 90 տոկոսը ծառայել են հայկական բանակում»,- ասաց Գևորգ Մելքոնյանը: