«Արմավիա» ավիաընկերության Երևան-Հալեպ չվերթի տոմսի արժեքը միանգամից թանկացել է մոտ 150 դոլարով և այժմ արդեն արժե 470 դոլար, ընդ որում՝ Հալեպից դեպի Երևան տոմսեր պատվիրելը շատ բարդ է, ասում են օդանավում տեղ չկա արդեն և պետք է սպասեն, իսկ Երևանից պատվիրելու ժամանակ պարզվում է, որ տեղեր կան: Այս մասին այսօր լրագրողների հետ հանդիպման ժամանակ ասաց սիրիահայ Հարութ Փալուլյանը:
Նրա խոսքով՝ նույն Երևան-Հալեպ երկկողմ ավիատոմսը սիրիական ավիաուղիները վաճառում է 320 դոլարով, բայց մինչև սեպտեմբերի կեսեր տեղ չկա:
Մասնագիտությամբ տնտեսագետ Նարեկը մտադիր է այլևս չվերադառնալ Սիրիա և հաստատվել Հայաստանում: Նա արդեն դիմել և ստացել է 10 տարվա կացության իրավունք և մեծ գոհունակություն հայտնեց ՀՀ իշխանություններին, որ ընդունում են սիրիահայերին: Նշենք, որ մինչ օրս շուրջ 8000-ից ավելի սիրիահայեր դիմել են ՀՀ իշխանություններին քաղաքացիություն տալու համար:
