Թուրքիայի արտգործնախարար Ահմեդ Դավութօղլուն Թբիլիսիում իր գործընկեր Գրիգոլ Վաշաձեի հետ ունեցած բանակցություններից հետո հայտարարել է, որ երկու երկրներն արդեն սկսել են իրենց քաղաքացիների համար սահմանի անցումը հեշտացնելու գործընթացը, որի շնորհիվ մարդիկ սահմանը կարող են անցնել առանց անձնագրի` միայն ինքնության քարտերով:
Todayszaman.com կայքը տեղեկացնում է, որ, մասնավորապես, Կովկասի ամենամեծ ու ծանրաբեռնված՝ Սարպիի անցակետում գործելու է «մեկ պատուհանի մաքսակետ», ինչը թույլ կտա սահմանի անցումն ու ապրանքների մաքսազերծումը կատարել մի տեղում:
Դավութօղլուն ասել է, որ այս քայլը լուրջ խթան է երկկողմ տնտեսական հարաբերությունների զարգացման համար:
Վաշաձեն և Դավութօղլուն բանակցությունների ընթացքում անդրադարձել են նաև երկու երկրների տարածքում կրոնական կառույցների վերանորոգման և կառուցման համաձայնությանը, սակայն կոնկրետ փաստաթղթեր չեն ստորագրվել: Այս ոլորտը, ըստ Դավութօղլուի, համագործակցության կարևոր բնագավառ է, իսկ Թուրքիան անելու է ամեն հնարավորը վրացական եկեղեցիների վերականգնման համար:
Իր հերթին Վաշաձեն տեղեկացրել է, որ մոտ ապագայում կայանալու է նախարարների ևս մի հանդիպում, որտեղ քննարկվելու են Կովկասում անվտանգության խնդիրները և ռուս-վրացական կոնֆլիկտը:
