Անգլիայի առաջնության 27-րդ տուրի կենտրոնական հանդիպումը կայացավ Մանչեսթրի «Օլդ Թրաֆֆորդ» մարզադաշտում. մրցաշարային աղյուսակի առաջատար «Յունայթեդ»-ն ընդունել էր 3-րդ տեղում ընթացող «Սիթի»-ին: Այս հանդիպումը, Անգլիայի առաջնության ամենասպասված դերբին լինելուց բացի, արդեն ճանաչվել էր ոչ միայն ֆուտբոլային, այլև ամբողջ աշխարհի պատմության ամենաթանկ մարզական իրադարձությունը. երկու թիմերի խաղացողների ընդհանուր արժեքը 850 մլն. դոլարից ավելին է:
Երկու թիմերն էլ այս խաղին հատուկ էին պատրաստվել: «Քաղաքաբնակներ»-ի մարզիչ Ռոբերտո Մանչինին որոշել էր երկու կարճահասակ հարձակվողներով խաղալ` Կարոլոս Տևես և Դավիդ Սիլվան` արգենտինացուց մի փոքր ետ: Ալեքս Ֆերգյուսոնն ի պատասխան դաշտ էր դուրս բերել ընդամենը մեկ հարձակվողի` Ուեյն Ռունիին` պահեստայինների նստարանին թողնելով թիմի և ընթացիկ առաջնության գլխավոր ռմբարկու Դիմիտար Բերբատովին:
«Սիթի»-ի մեկնարկային ակտիվությունից հետո խաղը հանգստացավ, և թիմերը սկսեցին ավելի շատ մտածել գնդակ բաց չթողնելու, քան հարձակվելու մասին:
Առաջինը սխալվեցին «Սիթի»-ի պաշտպանները: 41-րդ րոպեին Գիգսի ճշգրիտ փոխանցումից հետո Նանին բացեց հանդիպման հաշիվը:
Երկրորդ խաղակեսում Մանչինի խաղադաշտ դուրս բերեց երրորդ հարձակվողին` Էդին Ջեկոյին, ինչը շուտով տվեց իր արդյունքը: 65-րդ րոպեին բոսնիացին ընդունեց Ռայթ Ֆիլիպսի փոխանցումը, շրջվելով հարվածեց` գնդակը դիպավ Դավիդ Սիլվային և հայտնվեց Վան դեր Սարի դարպասում` 1:1:
Բաց թողած գոլից հետո արդեն Ֆերգյուսոնը դաշտ դուրս բերեց իր երկրորդ հարձակվողին, բայց Բերբատովի ներկայությունը խաղի ընթացքի վրա մեծ ազդեցություն չունեցավ:
Ըստ ամենայնի հավասար պայքարում անցած հանդիպումն այդպես էլ կավարտվեր, եթե չլիներ Ռունիի վիրտուոզ գոլը, որն արդեն շատերը հասցրել են անվանել «Մանչեսթր Յունայթեդ»-ի պատմության ամենագեղեցիկ գոլը. 78-րդ րոպեին Նանին բարձրից փոխանցում կատարեց տուգանային հրապարակ, որտեղ մեջքով դեպի դարպասը գտնվող Ուեյն Ռունին ընթացքից շրջադարձ հարվածով գրավեց Ջո Հարթի պաշտպանած դարպասի վերևի անկյունը` 2:1:
«Սիթի»-ի պարտությունից անմիջապես օգտվեցին «Արսենալ»-ն ու «Տոտենհեմ»-ը: Արսեն Վեգների սաները գերազանց մարզավիճակ ձեռք բերած հոլանդացի ռմբարկու Ռոբին վան Պերսի դուբլի շնորհիվ վստահ հաղթանակ տարան «Վուլվերհեմփթոն»-ի նկատմամբ և «քաղաքաբնակներ»-ին արդեն գերազանցում են 4 միավորով: Իսկ Հարի Ռեդնափի թիմը հերթական կամային հաղթանակը տոնեց: Այս անգավ «Տոտենհեմ»-ը հյուրընկալվելիս 1:2 հաշվով պարտության մատնեց «Սանդերլենդ»-ին և այժմ երկու միավորով է զիջում «Սիթի»-ին: Ասամոա գյանի 11-րդ րոպեին խփած գոլին հյուրերը պատասխանեցին Դոուսոնի /44/ և Կրանչարի /57/ գոլերով:
27-րդ տուրի մյուս հանդիպումներումներում գրանցվեցին հետևյալ արդյունքները` «Բիրմինհեմ»-»Սթոուք»` 1:0, «Բլեքբըրն»-»Նյուքասլ»` 0:0, «Լիվերպուլ»-»Ուիգան»` 1:1, «Վեսթ Բրոմվիչ»-»Վեսթ Հեմ»` 3:3, «Բոլթոն»-»Էվերտոն»` 2:0, «Ֆուլհեմ»-»Չելսի» հանդիպումը կկայանա այսօր:
