Պակիստանի Գերագույն դատարանը հուլիսի 12-ին երկրի նոր վարչապետ Ռաջ Փերվեզ Աշրաֆից պահանջել է վերսկսել երկրի նախագահ Ասիֆ Ալի Զարդարիի դեմ սկսված գործը: Այս մասին հաղորդում է The Daily Telegraph-ը:
Զարդարիին կասկածում են շվեյցարական բանկերի միջոցով շուրջ 12 մլն դոլարի անօրինական փողերի լվացման մեջ:
The Hindu-ի փոխանցմամբ` դատարանի որոշմամբ Աշրաֆը պետք է դիմի շվեյցարական իշխանություններին` խնդրելով գործ հարուցել Զարդարիի դեմ մինչև հուլիսի 25-ը:
Եթե Աշրաֆը չկատարի պահանջը, նրա նկատմամբ «կկիրառվեն միջոցառումներ` նախատեսված Սահմանադրությամբ ու օրենսդրությամբ»,- նշված է Գերագույն դատարանի հայտարարության մեջ:
Թե ինչպես է դատարանի որոշմանը արձագանքել Աշրաֆը` հայտնի չէ: Նշվում է միայն, որ կառավարությունը խորհրդատվության նպատակով դիմել է արդարադատության նախարարությանը:
2012թ. հունիսին Գերագույն դատարանը պաշտոնանկ էր արել վարչապետ Յուսուֆ Ռեզա Գիլանին` դատարանի նկատմամբ անհարգալից վերաբերմունքի ու չենթարկվելու համար:
Վերջինս հրաժարվել էր կատարել Գերագույն դատարանի որոշումը` դատական գործ վերսկսել իր ընկերոջ ու համախոհի` Զարդարիի նկատմամբ:
