Ռազմական ուժերի բարձրագույն խորհուրդը երեկ հայտարարել է, որ մինչև նոր սահմանադրության մշակումն ու ընդունումը, երկրում դադարեցվում է սահմանադրության գործողությունը, ինչպես նաև ցրվել են Եգիպտոսի խորհրդարանի երկու պալատները: Բարձրագույն խորհուրդը նաև հայտարարել է սահմանադրական հանձնաժողովի ստեղծման մասին:
Մինչև նոր ընտրությունները և քաղաքացիական իշխանության ձևավորումը` երկրի ղեկավարի պաշտոնը ստանձնել է պաշտպանության նախարար, Ռազմական ուժերի բարձրագույն խորհրդի նախագահ ֆելդմարշալ Հուսեյն Տանտաուին:
Երկրի կառավարությունը շարունակելու է գործել նույն կազմով: Վարչապետ Ահմեդ Շաֆիկը հայտնել է, որ նորանշանակ փոխնախագահ Օմար Սուլեյմանի հետագա քաղաքական ճակատագիրը կորոշի ռազմական իշխանությունը:
Եգիպտոսում ստեղծվել է նաև Հոգաբարձուների խորհուրդ, որը կազմված է լինելու բողոքի ցույցերի կազմակերպիչներից և երկրում հայտնի հասարակական քաղաքական գործիչներից, որոնք իրականացնելու են կապը երկրի զինվորական իշխանության հետ: Բացի այդ, հենց այդ խորհուրդն է որոշելու բողոքի ակցիաների անցկացման նպատակահարմարության հարցը:
Մինչ այս որոշումների կայացումը` այսօր Թահրր հրապարակում տեղի է ունեցել ընդհարում ցուցարարների և զինվորականների միջև: ցուցարարները հայտնել են, որ չեն լքի հրապարակն այնքան ժամանակ, քանի դեռ չեն իրականացվել իրենց կողմից առաջարկված բարեփոխումները:
