ՀՀԿ խմբակցության ղեկավար Գալուստ Սահակյանը մեզ հետ զրույցում հայտարարեց, որ ողջունում է «Ժառանգության» քայլը՝ օրինագիծը հետաձգելու վերաբերյալ։ Ըստ Սահակյանի՝ այդ կուսակցությունը նեղկուսակցական շահերից կարողացավ դուրս գալ ու համազգային շահերով առաջնորդվել։
ՀՅԴ ԳՄ անդամ, ԱԺ արտաքին հարաբերությունների մշտական հանձնաժողովի նախագահ Արմեն Ռուստամյանը մեզ հետ զրույցում ասաց, թե ԼՂՀ անկախության ճանաչման օրինագծի հարցը պետք է վաղուց փոխզիջվեր, ու այնպես արվեր, որ այս իրավիճակին չհասցներ խորհրդարանը։ «Մեզ համար կարեւորը խուսափելն էր քվեարկությունից, քանի որ այն չի տալու դրական արդյունք: Այստեղ հաղթողներ ու պարտվողներ չեն լինելու, եթե քվեարկությունը կայանար, լիներ բացասական արդյունք, իսկ քվեարկության չկայացումը եւս բացասական արդյունք է, դրանից չգիտեմ՝ քաղաքական ուժերն ինչ են շահելու, բայց որ երկիրը կորցնելու էր, դա հաստատ է»,- ասաց Արմեն Ռուստամյանը: