Հոսնի Մուբարաքի հեռանալուց ամենից շատ տարածաշրջանում թերևս մտահոգված է Իսրայելը: Մուբարաքն էր, որ չէր խախտում Իսրայելի հետ ստորագրված խաղաղության պայմանագիրը, ինչպես նաև միջնորդի դեր էր ստանձնել պաղեստինա-իսրայելական բանակցություններում և շփումներում:
Հիմա Իսրայելի համար անորոշության նոր փուլ է սկսում: Շատերը ամերիկյան վարչակազմի անորոշ պահվածքը Եգիպտոսի դեպքերի ժամանակ պայմանավորում են հենց իսրայելական գործոնով: Հրեաները իրենց ազդեցիկ կառույցների միջոցով փորձում էին ԱՄՆ օգնությամբ իշխանության պահել Մուբարաքին, քանի որ այս պահին մեկ այլ ռեալ թեկնածու չունեին: Բացի այդ, իսրայելցիների համար անընդունելի է Եգիպտոսում իսլամիստական կառույցների իշխանության գալը:
Իսրայելն այժմ շատ լուրջ կացության մեջ է հայտնվել: Ամենամեծ արաբական երկիրը, որը տասնամյակներ շարունակ եղել է Իսրայելի անվտանգության հիմնական գրավականներից մեկը, լուրջ վերափոխումների փուլում է: Իսրայելական մամուլում վերջին օրերին լուրջ մեղադրանքներ էին հնչում ամերիկյան վարչակազմի հասցեին` իրենց դաշնակցին` Մուբարաքին, հանձնելու համար:
Այսօր մամուլում հայտնվել է մի շատ ուշագրավ հրապարակում: Reuters լրատվական գործակալությունը փոխանցում է, որ Հոսնի Մուբարաքը հրաժարականից մեկ օր առաջ սուր քննադատության է ենթարկել ԱՄՆ իշխանությունների մերձավորարևելյան քաղաքականությունը` այն բնութագրելով որպես ժողովրդավարության հասնելու կեղծ ձգտում: Մուբարաքի արտահայտած այս մտքերի մասին պատմել է Իսրայելի խորհրդարանի` Քնեսեթի պատգամավոր Բենյամին Բեն-Էլիզերը, որը փետրվարի 11-ին հեռախոսազրույց է ունեցել Մուբարաքի հետ:
Բեն-Էլիզերը հայտնել է, որ ԱՄՆ քաղաքականությունը տարածաշրջանում բերել է ծայրահեղ իսլամականների ակտիվացմանը: Նրանք պայքարում էին Իրանում իշխանափոխության համար` իշխանության եկավ իսլամական դիկտատուրան, նրանք ժողովրդավարություն էին հաստատում Գազայում` իշխանության եկավ Համասը:
Բացի այդ, Մուբարաքը կանխատեսել է, որ եգիպտական օրինակով հուզումներ են լինելու նաև Մերձավոր Արևելքի մյուս երկրներում: Մուբարաքը նաև վերահաստատել է, որ նույնիսկ կյանքի գնով մնալու է Եգիպտոսում և չի հեռանալու այնտեղից: