ԱՄՆ նախագահ Բարաք Օբաման մեկնաբանել է Եգիպտոսի նախագահ Հոսնի Մուբարաքի հրաժարականը, որը ղեկավարել է երկիրը 30 տարի:
Ինչպես հայտնում է Associated Press գործակալությունը, Բարաք Օբաման հայտարարել է, որ Մուբարաքի հրաժարականը վերջը չէ, այլ այս երկրում դեպի դեմոկրատիա թևակոխելու սկիզբը:
Սպիտակ տան ղեկավարը դրական է արձագանքել Եգիպտոսի առաջնորդի հրաժարականին, որը «բավարարել է իր երկրի ժողովրդի փոփոխությունների ձգտման գործընթացը»: Սակայն Օբաման զգուշացրել է, որ առջևում Եգիպտոսի համար «ծանր օրեր» են սպասվում, քանի որ նոր իշխանությունները պետք է անցկացնեն «արդար և թափանցիկ» ընտրություններ:
Օբաման նաև նշել է, որ եգիպտական բանակի բարձրագույն ղեկավարությունը ցուցաբերել է մեծ «հայրենասիրություն և պատասխանատվություն»` Մուբարաքից ստանձնելով երկրի իշխանությունը: Ամերիկայի նախագահը նշել է, որ հենց նրանց վրա է դրված ընտրությունների կազմակերպումը:
Օբաման կոչ է արել ռազմական ղեկավարությանը չեղյալ համարել 1981թ.-ից հայտարարված արտակարգ դրությունը, որը գործում է նախորդ նախագահ Անվար Սադաթի սպանությունից հետո: Սպիտակ տան ղեկավարը հավելել է, որ անհրաժեշտ է վերանայել սահմանադրությունը և անցկացնել «ազատ և թափանցիկ ընտրություններ»:
Նա նաև ողջունել է եգիպտական զորքերի ստորաբաժանումներին նրա համար, որ նրանք չփորձեցին կրակել ժողովրդի վրա: Նա կոչ արեց նոր ղեկավարությանը «պաշտպանել Եգիպտոսի ժողովրդի իրավունքները»:
Բացի այդ, ԱՄՆ առաջնորդը նշել է, որ «իր երկիրը կշարունակի մնալ Եգիպտոսի բարեկամն ու գործընկերը»` խոստանալով, որ Վաշինգտոնը Կահիրեին կտրամադրի այն օգնությունը, որը նրան պետք է: Օբաման 2011թ.-ի հունվարի 25-ին Եգիպտոսում սկսված զանգվածային ակցիաները համեմատեց Գերմանիայի իրադարձությունների հետ, որը բերեց բեռլինյան պատի փլուզմանը, ինչպես նաև Հնդկաստանում Մահաթմա Գանդիի ընդդիմադիր գործողությունների հետ: