«Նյութապաշտ համակարգերի ներսում հարաբերությունները ո՛չ ինձ են հետաքրքրում, ո՛չ էլ պետք է մեր ժողովրդին հետաքրքրեն, որովհետև դրանք նոր որակ չեն բերում»,- իշխող կոալիցիայի ներսում առաջացած անհամաձայնություններին անդրադառնալով` «Առաջին լրատվականի» հետ զրույցում կարծիք հայտնեց «Ղարաբաղ» կոմիտեի անդամ Աշոտ Մանուչարյանը:
Մանուչարյանը նաև աննիմաստ համարեց քննարկել Ռոբերտ Քոչարյանի գործոնը ՀՀԿ-ԲՀԿ տարաձայնությունների մեջ` նշելով, որ Քոչարյանն էլ է այդ համակարգից. «Քոչարյանն այդ համակարգի մարդ է և այդ համակարգի մեջ եղած քաշքշուկները, կամ թե ով կհաղթի կամ կպարտվի, երկրի համար նոր որակ չեն բերելու»:
Մանուչարյանի գնահատմամբ այդ ընդհանրական համակարգի մեջ մտնում են ոչ միայն ՀՀԿ-ն, ԲՀԿ-ն և Քոչարյանը, այլև հեղափոխական կուսակցություններից առանձին մարդիկ, ովքեր նյութապաշտ են և հանուն հարստության պատրաստ են միմյանց կոկորդ կրծելու.
«Այդ մարդկանցից մի բուռ հարստությամբ առնել են իրենց հոգիները, այդտեղ դատարկ տարածք է, և դրան ես ոչ մի կարևորություն չեմ տեսնում»:
Ըստ Մանուչարյանի` ՀՀԿ-ԲՀԿ պայքարի արդյունքում մյուս ուժերի համար ստեղծվում են լրացուցիչ հնարավորություններ: