Հայրապետյանը պետք է հրաժարվեր իր բոլոր հանրային դիրքերից, դա այն գինն էր, որը նա պետք է վճարեր: «Առաջին լրատվական»-ի հետ զրույցում ասաց «Դեմ ենք օտարալեզու դպրոցների վերաբացմանը» նախաձեռնության անդամ Արմեն Հովհաննիսյանը՝ անդրադառնալով երեկ երեկոյան «Հարսնաքար» ռեստորանային համալիրի մոտ տեղի ունեցած իրադարձություններին:
Նա նշեց, որ երեկ ռեստորանային համալիրի հարևանությամբ ոստիկանության գործողությունները կարելի է համեմատել Մաշտոցի պուրակի դեպքերին: Ըստ նրա՝ Մաշտոցի պուրակում բոլոր էքսցեսներով հանդերձ, զգացվում էր, որ կա մի գիծ, որը ոստիկանները չեն պատրաստվում անցնել: «Երեկ, թեև շատ կարճ տևեց ոստիկանության հետ բախումը, ցնցված էի, որ կանանց ուղղված սեռական հայհոյանքներ են հնչում, ոմանց աչքերում իսկապես ատելություն կար, կարծես թե դիմացի կանգնածները անձամբ իրենց պատկանող «Հարսնաքարին» են մոտենում, չնայած, անկեղծ ասած, ոչ ոք չէր պլանավորում վնաս հասցնել շինությանը կամ Ռուբեն Հայրապետյանի սեփականությանը, այնտեղ մոմավառություն պետք է լիներ»,- նշեց Արմեն Հովհաննիսյանը՝ հավելելով, որ իր համար դա ահավոր հետընթաց էր: Նրա խոսքով՝ այդ ագրեսիան փոխանցվում է հասարակությանը շղթայաձև, շղթայաձև փոխանցվում է հասարակ պահակ ու ոստիկանին` հանրության դեմ գործելու:
Արմեն Հովհաննիսյանի կարծիքով՝ երեկ «Հարսնաքար» ռեստորանային համալիրի մոտ պետք է լինեին սահմանափակ թվով ոստիկաններ, մարդիկ կմոտենային ռեստորանային համալիրին, մոմ կվառեին, վանկարկություններ կանեին, որոնք պարոն Հայրապետյանի համար կլինեին տհաճ: «Բայց ես կարծում եմ, որ իր ենթակաների պահվածքի հետևանքներն անհամեմատ ավելի տհաճ են, քան այդ վանկարկումները, մարդիկ կարտահայտեին իրենց վերաբերմունքը և կգնային այդտեղից: Երեկ այնպիսի զինվորական պատրաստություն էր այնտեղ, կարծես պետական նշանակության օբյեկտ է «Հարսնաքարը», և պետությունն իր ամենակարևոր պաշարները, ռեսուրսները ներդնում է, որպեսզի պահի այդ պետական նշանակության օբյեկտը ինչ-որ չար ուժերից: Դա պարզապես աբսուրդ է»,- նկատեց Արմեն Հովհաննիսյանը:
Անդրադառնալով տեսակետներին, թե չէր կարելի Հայրապետյանի տան մոտ ակցիա անցկացնել՝ ասաց, որ այդ երթը պլանավորված չէր, այդ երթը եղավ ոստիկանության հետ ընդհարումից հետո: Նրա մեկնաբանմամբ՝ մարդիկ գնացին Հայրապետյանի տուն իրենց չարտահայտած բողոքն արտահայտելու: «Ռուբեն Հայրապետյանն անձամբ պետք է ներողություն խնդրեր Վահե Ավետյանի ընտանիքից, կոմպենսացներ բարոյական և բոլոր վնասները, իրեն հանձներ արդարադատությանը, հնարավորություն տար, որ պատկան մարմիններն օբյեկտիվ քննեն տեղի ունեցածը, բոլոր հանրային դիրքերից հրաժարվեր, քանի որ խոսքը մարդու կյանքի մասին է, խոսքը չի գնում փողոցը սխալ անցնելու մասին»,- ասաց Արմեն Հովհաննիսյանը՝ ընդգծելով, որ դա այն գինն է, որը նա պետք է վճարեր: