Որևէ երկրի ոստիկանությանը վայել չէ խուլիգանների համար տանիք դառնալ: Այսօր «Առաջին լրատվական»-ի հետ զրույցում այս մասին ասաց քաղաքագետ Նվարդ Մանասյանը՝ անդրադառնալով երեկ՝ երեկոյան, «Հարսնաքար» ռեստորանային համալիրի հարևանությամբ՝ Աճառյան փողոցում, Վահե Ավետյանի հիշատակին կազմակերպված մոմավառության մասնակիցների նկատմամբ ոստիկանության գործողություններին: Նա մեծ կարևորությամբ նշեց, որ որոշ ոստիկաններ հայհոյանքներ էին ուղղում քաղաքացիներին:
«Ուզում եմ հասկանալ, թե ինչպես են որոշում ոստիկանության գործողությունների համաչափությունը, և ինչքանո՞վ էր երեկվա գործողությունը համաչափ:
Հատուկ խնդրանք է, որ հատուկ վայրենություն ունեցող առանձին ոստիկանների համար միգուցե պարոն Գասպարյանը նոր մեխանիզմներ ներմուծի, որ ագրեսիայի պոտենցիալ ունեցող ոստիկաններ չլինեն մեր ոստիկանությունում, որովհետև ոստիկանությունը կոչված է պաշտպանելու օրենքը, օրինական կարգը. ագրեսիվ մարդիկ, որոնք հրահրում են կոնֆլիկտ, տեղ չունենան ոստիկանությունում»,- իր ցանկությունը հայտնեց Նվարդ Մանասյանը՝ շարունակելով, որ կան երկրներ, որտեղ թեստեր են անցկացվում, որ շեղումներ ունեցող, գռեհիկ մարդիկ տեղ չունենան ոստիկանությունում: Նա փաստեց, որ երեկ՝ այս էլ որերորդ անգամ առանձնանում էին հատուկ դեմքեր, որոնք ուղղակի անշնորհք պահվածք ունեին: Որևէ երկրի ոստիկանությանը վայել չէ խուլիգանների համար տանիք դառնալ, մինչդեռ իսկապես կան դեպքեր, երբ ոստիկանները խուլիգան են և անօրինականության մասնակից:
Հիշեցնենք, որ երեկ՝ երեկոյան, բիրտ ուժ կիրառելով՝ ոստիկանությունը բացեց «Հարսնաքար» ռեստորանային համալիրի հարևանությամբ գտնվող Աճառյան պողոտան, որը փակվել էր մոմավառության մասնակիցների կողմից: