«Մոսկվայում գտնվելու ընթացքում Ռոբերտ Քոչարյանի հանդիպումների շարքը և գործողությունները ցույց են տալիս, որ նա ունի բավականաչափ լուրջ տնտեսական խնդիրներ` այդ թվում արտերկրում»,- անդրադառնալով Ռոբերտ Քոչարյանի վերջին այցին Մոսկվա` կարծիք հայտնեց ՆԺԿ ղեկավար Արամ Կարապետյանը:
Ըստ Կարապետյանի` Սերժ Սարգսյանի այցը Կիպրոս և Հունաստան ևս պայմանավորված էր տնտեսական բնույթի հարցերով. «Կիպրոսը` որպես ԵՄ անդամ, պիտի հրաժարվեր օֆշորային բոլոր գոտիներից, միգուցե հայաստանյան որոշակի գործարար անձինք, պետական գործիչներ այնտեղ ունեին գրանցված ֆիրմաներ, բանկային հաշիվներ, և հարց է ծագում, թե ուր պիտի տարվեն այդ փողերը: Սերժ Սարգսյանը հենց այդ հարցերը կարգավորելու համար էր գնացել Կիպրոս և Հունաստան»:
Արամ Կարապետյանը մեկնաբանեց նաև Սերժ Սարգսյանի այցը Մյունխեն և հանդիպումը Հիլարի Քլինթոնի հետ: Նրա կարծիքով, այդ հանդիպման նպատակը WikiLeaks-ի հայկական դոսյեի հրապարակման հետ կապված խնդրանքներն են եղել:
Անդրադառնալով ամերիկյան Stratfor հետազոտական կենտրոնի փորձագետների հրապարակած զեկույցին, որտեղ նշվում է, թե Հայաստանում և հետխորհրդային մյուս պետություններում Եգիպտոսի իրադարձությունների կրկնությունը քիչ հավանական է, Կարապետյանն ասաց. «Որքան ես եմ հիշում, Stratfor-ը կարծես թե արաբական աշխարհի մասին էլ 2010 թվականին կանխատեսել էր, որ փոփոխություններ չեն լինի: Հարգելով Stratfor-ի վերլուծաբաններին և փորձագետներին` այդուհանդերձ համարում եմ, որ նրանք դրսից անում են այն, ինչ Ահարոն Ադիբեկյանն անում է ներսում»:
Հարցին, թե ո՞ւմ պատվերն է կատարում Stratfor-ը` Արամ Կարապետյանը պատասխանեց. «Սերժ Սարգսյանի, այդ ամենն արվում է Միքայել Մինասյանի միջոցով: Մինասյանը Սերժ Սարգսյանի փեսան է»: