BBC-ի փոխանցմամբ, Հոսնի Մուբարաքը լքել է Կահիրեն: Այս տեղեկությունը հեռուստաալիքին է հաղորդել օտարերկրյա հետախուզության բարձրաստիճան մի պաշտոնյա: Այն, որ Մուբարաքը լքել է Կահիրեն` հայտնել են նաև մի քանի հեռուստաալիքներ, այդ թվում Al-Arabia-ն և իսրայելական մի հեռուստաալիք: Այդ մասին France Presse գործակալությանը հայտնել է նաև կառավարությանը մոտ կանգնած աղբյուրը: Արաբական BBC-ի աղբյուրները հաստատում են, որ Մուբարաքը գտնվում է Շարմ Ալ-Շեյխի իր նստավայրում: Այսօրինակ տեղեկություններ երեկ էլ էին սպրդում լրատվական հոսքերում, սակայն դրանք չեն հաստատվում:
Այս պահին հայտնի է, որ մեծ բազմություն է հավաքվում Կահիրեի մեծ հրապարակներում: Ցուցարարներն ամենուր են: Մենք արդեն տեղեկացրել էինք, որ մարդիկ հավաքվել են նաև պետական հեռուստատեսության մոտ և թույլ չեն տալիս այնտեղից դուրս գալ: AL-Jazeera-ի ուղիղ եթերում ընդդիմության ակտիվիստներից մեկը հայտնեց, որ իրավիճակը շեշտակիորեն փոխվելու է առաջիկա ժամերի ընթացքում, սակայն չնշեց, թե ինչ որակական փոփոխություններ են լինելու: Նա միայն ավելացրեց, որ առաջիկա ժամերը որոշիչ են լինելու:
Տեղեկություններ կան, որ ցուցարարները մի քանի ուղղություններով շարժվում են դեպի նախագահական նստավայր, սակայն նախագահական նստավայր տանող ճանապարհներին առկա է զինվորական մեծ ներկայություն: Արաբական որոշ լրատվամիջոցներ տեղեկացնում են, որ նախագահական նստավայրի մոտ են հավաքվում նախագահի կողմնակիցները, սակայն նրանց թիվը փոքր է: Հաղորդվում է նաև փոքր բախումների մասին: