Այսօր Սերժ Սարգսյանի մոտ տեղի է ունենալու կոալիցիայի խորհրդի նիստ: Կասկած չկա, որ նիստի առանցքային հարցը լինելու է ՀՀԿ-ԲՀԿ հարաբերությունը, գուցե նաև այդ համատեքստում Ռոբերտ Քոչարյանի գործոնը:
Թե հատկապես ինչ եզրահանգումների կգա կոալիցիայի խորհուրդը, և ինչպես կանցնի նիստը՝ թերևս, լավագույնս կերևա փետրվարի 12-ին, այսինքն՝ վաղը կայանալիք ԲՀԿ համագումարի ընթացքում: Համագումարի բովանդակությունն ու տրամադրությունները կարտահայտեն, թե այսօր ինչ տրամադրությամբ են միմյանց հրաժեշտ տվել կոալիցիոն գործընկերները:
Այդ համատեքստում հետաքրքրական է, որ խորհրդարանական ԲՀԿ խմբակցությունը այսօր չի ներկայացել խորհրդարանական ճեպազրույցներին: Դա վկայում է, որ ԲՀԿ-ում ակնհայտորեն բավական լուրջ և թեժ քննարկումներ են առկա կոալիցիոն գործընկերների, մասնավորապես՝ ՀՀԿ հետ հարաբերությունների առումով:
Ճեպազրույցներին չներկայանալը վկայում է, որ ԲՀԿ-ն կա՛մ չի կարողանում որևէ որոշում կայացնել, կա՛մ էլ կայացրել է մի որոշում, որի մասին դժվարանում է հրապարակավ հայտարարել և փորձում է հնարավորինս ձգել դրա հրապարակայնացումը՝ հասկանալով, որ դա ամենևին իր օգտին չէ: Այդպիսի որոշում կլինի, իհարկե, այն, որ ԲՀԿ-ն հայտարարի նախագահի ընտրությանը Սերժ Սարգսյանին սատարելու մասին: Այստեղ է ՀՀԿ-ԲՀԿ հարաբերությունների մեխը, որը կարող է կա՛մ ԲՀԿ-ին ծակել, կա՛մ ծակել ՀՀԿ-ին:
Այդուամենայնիվ, քիչ հավանական է, որ այսօր ընդունվի որևէ առանցքային որոշում: Առավելագույնը, որ սպասելի է, թերևս կլինի այն, որ կողմերը ժամանակավոր հրադադարի մասին ինչ-որ բանի շուրջ պայմանավորվեն: Չի բացառվում, որ դրան նաև փաստաթղթի տեսք տրվի առաջիկայում: Սակայն խնդիրն այն է, որ Հայաստանի ներկայիս ներիշխանական հակասությունների աղբյուրը ամենևին էլ Հայաստանը չէ:
Այդ հակասությունները համաշխարհային զարգացումների հետևանք են, արտացոլում: Հենց դա է հարցը, որ «եգիպտոսը» այսօր հատուկ անուն չէ և ոչ էլ հատուկ ոճ: «Եգիպտոսն» այսօր մթնոլորտ է, երևույթ, որ տարածվում է աշխարհում: Իսկ թե որ երկրում ինչ տեսքով այն կարտահայտվի՝ դա արդեն այլ խնդիր է: Այնպես որ, ՀՀԿ-ն ու ԲՀԿ-ն գուցե ներքուստ ունեն հաշտվելու և իրար ցավ ու անհանգստություն չպատճառելու անկեղծ ցանկություն (միգուցե նրանցից ամեն մեկի խիղճը տանջում է մյուսին մի թեթև տհաճություն պատճառելուց անգամ), բայց այդ ամենը վեր է նրանց ուժերից: Նրանք ավելի ուժեղ չեն, քան, ասենք, Մուբարաքը: