Թուրքական Doğan լրատվական գործակալության փոխանցմամբ՝ Վանի նահանգի Լիչան գյուղում միմյանց են բախվել գյուղական պահապաններն ու Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) զինյալները:
Բախումը գրանցվել է երեկ՝ տեղական ժամանակով ժամը 19.30-ին: Բախման հետևանքով զոհվել է 2 գյուղական պահապան: Վիրավորվել է նաև 1 զինծառայող: Բախումից հետո տվյալ շրջանում սկսվել են լայնամասշտաբ որոնողական գործողություններ:
Հիշեցնենք, որ PKK-ն ստեղծվել է 1978 թվականին, իսկ նրա ակտիվ զինված պայքարը Թուրքիայում մեկնարկել է 1984 թվականին: Դրանից արդեն 1 տարի անց՝ 1985 թվականի մարտի 16-ին, թիվ 442 օրենքով որոշվեց ստեղծել գյուղական պահապանների (տեղական կամավոր պայմանագրայինների) համակարգ: Դրա նախաձեռնությունը պատկանում էր Թուրքիայի արևելյան ու հարավարևելյան քրդաբնակ նահանգների նահանգապետերին ու ներքին գործերի նախարարությանը:
Վարչական առումով՝ գյուղական պահապանները ենթարկվում են նահանգապետերին, իսկ իրենց բուն գործունեության տեսանկյունից՝ Ժանդարմերիայի տարածաշրջանային հրամանատարությանը: Չնայած այդ ամենին, ՆԳՆ-ն ցայժմ հազարավոր գյուղական պահապանների մեղադրել է PKK-ին համակրելու մեջ:
