Աշխարհում ցանկացած ավիաընկերության օդանավերի տոմսերի գնագոյացումը պայմանավորված է սեզոնայնությամբ: Ինչպես «Առաջին լրատվական»-ի հետ զրույցում պարզաբանեց «Ավիատրանս» ընկերության գլխավոր տնօրեն Տիգրան Աչոյանը, յուրաքանչյուր երկրում կամ տարածաշրջանում սեզոնայնության տարբեր տրամաբանություններ կան՝ մի տեղ ակտիվ է ամառը, մյուս տեղում՝ ձմռանը: Այդ տեսանկյունից Հայաստանում ակտիվ են հունիս, հուլիս օգոստոս, սեպտեմբեր ամիսները, պասիվ՝ հունվար, փետրվար, մարտ, նոյեմբեր, և միջին են մնացած 4 ամիսները՝ հոկտեմբեր, դեկտեմբեր, ապրիլ, մայիս: Ըստ Աչոյանի՝ սեզոնից կախված մինչև 20-30% և ավելի գնային տատանումներ են լինում:
Ավիատոմսերի գները տարբերակվում են նաև օդանավի սպասարկման կարգերից՝ առաջին, բիզնես, էկոնոմ, բարձր, և ենթակարգերից, ինչպես նաև գինը կախված է ժամկետից, թե որքան շուտ ես ձեռք բերում ավիատոմսը և, իհարկե, տարադրամի փոխարժեքից:
Տ.Աչոյանը տեղեկացրեց, որ պասիվ սեզոնում Երևան-Մոսկվա չվերթի ամենաէժան ենթակարգը 2011-ի միջին գներով եղել է 92 հզ. դրամ, իսկ նույն ուղղությունը ակտիվ շրջանում՝ մինչև 160 հզ. դրամ, տատանումը մոտ 70% է:
«Դա կարող է ամեն տեղ լինել, դա կարող է լինել և՛ բրիտանական, և՛ չեխական, և՛ ավստրիական ավիաուղիներում»,- ասաց Տ.Աչոյանը:
Օրինակ, Էյր ֆրանսը Երևան-Լոս Անջելես ուղղության վրա պասիվ սեզոնին երկկողմ տոմսի անմենացածր գինը սահմանել է մոտ 900 եվրո, որն ակտիվ սեզոնին կարող է բարձրանալ մինչև 1800 եվրո, Աէրոֆլոտը Երևան-Պեկին ուղղությամբ նազագույնը 600 եվրոյով է վաճառում, առավելագույնը՝ 1200 եվրո: Նրա խոսքով, այդ կարգերը միշտ եղել են և ավիաընկերությունները տարին 2 անգամ կարող են գնանշում կատարել՝ հոկտեմբերի 20-մարտի 20-ը և մարտի 20-հոկտեմբերի 20-ը: Ընդ որում՝ աշնանային գները հրապարակվում են մայիս-հունիսին և ներդրվում են գլոբալ համակարգերում, որոնք հսկայական ցանցեր են և փոփոխություն չեն ընդունում, ընկերությունները միայն կառավարում են ըստ կարգերի:
Տ.Աչոյանը վստահեցրեց, որ «Արմավիան» պարզապես չի կարող մենաշնորհայն դիրք բռնել և ըստ ցանկության գին սահմանել. «Ավիացիան շաքարի ներկրում չի, որ մենաշնորհ լինի: Արմավիան կատարում է 4 չվերթ դեպի Մոսկվա, իսկ ռուսական ընկերությունները՝ 7 չվերթ և, եթե ոչ ճիշտ դնի գինը, ուղևորները կգերադասեն թռչել ռուսական ընկերությունների օդանավերով»:
Միաժամանակ, նա նշեց, որ ներկայում դեպի Հալեպ թռչելը կապված է մեծ ռիսկերի հետ և, հավանաբար, քաղաքական որոշում է կայացված՝ չվերթները վերսկսելու համար, ու ավիատոմսերի գների ցածրը լինելը մարդկային տեսակետից լավ կլիներ, բայց բարձրը կապված է առկա ռիսկերի հետ, քանի որ Սիրիայի տարածքն այսօր ապահովգրությամբ չի փոխհատուցվում:
Լուսանկարը՝ PanARMENIANPhoto-ի
