Դեկտեմբերին անցկացված Հայաստանի ավտոմոբիլային ֆեդերացիայի համագումարի և դրանից հետո էլ ավտոմոբիլային ֆեդերացիայի նախագահի պաշտոնի շուրջ խմորումները դեռևս շարունակվում են: Եվ շարունակվում այն աստիճանի սրված պայմաններում, որ գործը հասել է մինչև դատարան:
«Գագիկ Աղաջանյանն իր արբանյակների միջոցով ինձ դատի է տվել»,- դեռ հունիսի 26-ին լրագրողների հետ հանդիպմանը հայտարարեց Հայաստանի ավտոմոբիլային ֆեդերացիայի նախագահ Մկրտիչ Փիլթոյանը` հավելելով, որ ինքն արդեն գտել է ավտոմոբիլային ֆեդերացիայի նախագահի թեկնածու: «Դեռ անուն չեմ տա, բայց երբ այս ամենը և շոու հիշեցնող դատավարությունն ավարտվի, ես աշնանը կհրավիրեմ համագումար, կներկայացնեմ իմ հրաժարականը և կառաջադրեմ ՀԱՖ նոր նախագահի թեկնածուին»,- հայտարարեց Փիլթոյանը:
Գագիկ Աղաջանյանը «Ապավեն» բեռնափոխադրումների ընկերության գլխավոր տնօրենն է, ով, ըստ Փիլթոյանի, արհեստականորեն մի խումբ մարդկանց է ներգրավել ֆեդերացիայի կազմի մեջ, որոնց անդամավճարները մեկ հոգի է մուծել, որից հետո համագումար է հրավիրել և ինքն իրեն ֆեդերացիայի նախագահ է հռչակել:
Իսկ ինչ վերաբերում է այս պատմության մանրամասներին` Փիլթոյանի ներկայացմամբ մոտավորապես հետևյալն է. դեռևս դեկտեմբեր ամսին Փիլթոյանը ֆեդերացիայում անցկացրել է օրինական համագումար` ֆեդերացիայի հերթական համագումարը: Դետեմբերյան համագումարի ընթացքում, սակայն, փոփոխվել է ֆեդերացիայի կանոնադրության կետերից մեկը` այն է, թե ֆեդերացիայի նախագահ կարող է դառնալ ֆեդերացիայի յուրաքանչյուր անդամ: Համաձայն փոփոխության` մեկ տարուց պակաս ֆեդերացիայի անդամ հանդիսացող անձը չի կարող ղեկավար մարմնի անդամ լինել: Սա, ըստ Փիլթոյանի, նորմալ փոփոխություն է, քանի որ կառույցի ղեկավարը նախկինում գոնե մեկ տարի պետք է այդ կառույցի անդամ լիներ, ծանոթ լիներ ներքին խոհանոցին, գործերին, խնդիրներին:
Սակայն Կենտրոն և Նորք-մարաշ վարչական շրջանների ընդհանուր իրավասության դատարանում այժմ Գ. Աղաջանյանի կողմից դատական հայց է ներկայացվել, ըստ որի՝ վիճարկվում է դեկտեմբերյան համագումարի ընթացքում կանոնադրության նշված կետի փոփոխությունը, իսկ ավելի ստույգ` պահանջվում է չեղյալ համարել համագումարն ամբողջությամբ: Փիլթոյանի համոզմամբ` դատարանում իրականում ոչ թե կանոնադրության կետերից մեկի վիճարկումն է, այլ այս դատական հայցը հենց իր դեմ է ուղղված, քանի որ Գ. Աղաջանյանը փորձում է ամեն գնով խլել ֆեդերացիան: Իսկ դատը, նրա խոսքով, իրեն իսկական շոու է հիշեցնում:
Բանն այն է, որ երբ Փիլթոյանը դատարանում ներկայացել է որպես Հայաստանի ավտոմոբիլային ֆեդերացիայի նախագահ, դատավորը չի ընդունել այդ փաստը, նշելով, որ նախագահի անվան շուրջ վիճաբանություն կա, քանի որ մյուս կողմը ապրիլ ամսին համագումար է անցկացրել, և նրանք ընտրել են նախագահ. այդ փաստը գրանցվել է Հայաստանի արդարադատության նախարարության պետռեգիստրում:
«Ես ներկայացրի դատավորին, որ ապրիլին անցկացրած համագումարի արդյունքները ես բողոքարկել եմ Արդարադատության նախարարության վերահսկողության ծառայությունում, որոնք պարզել և անվավեր են համարել ապրիլին Գ. Աղաջանյանի անցկացրած համագումարը: Ո՛չ ցուցակ են ունեցել, ո՛չ 1/3-րդ ստորագրություն, ո՛չ նախագահության նիստ է եղել, ո՛չ մեր նախագահության անդամներից որևէ մեկը մասնակցել է այդ համագումարին: Սրանք բոլորը խախտումներ են:
Արդարադատության նախարարության վերահսկողության բաժինը անվավեր է ճանաչել այդ համագումարը: Դատավորը ուղղակի չկողմնորոշվեց` ինչը ինչոց է, ով ով է և ով է ի վերջո այս ֆեդերացիայի օրինական նախագահը:
Վեց ամիս անց նրանք նոր որոշել են վիճարկել դեկտեմբերյան համագումարը և այն համարել անօրինական… Ծիծաղելի է»,- պատմում է Մկրտիչ Փիլթոյանը: Նրա խոսքով` այս պահին համագումարը վիճարկողների մի մասը մասնակցել է այդ համագումարին. «Թող այդ պահին վիճարկեին մեր որոշումը, կամ երեք օր հետո գային ասեին»,- ասում է Փիլթոյանը:
Հուլիսի 3-ին այս գործով հերթական նիստն էր, որտեղ Մ. Փիլթոյանը պետք է չգիտես որտեղից տեղեկանք ներկայացներ, որ ինքն է ֆեդերացիայի նախագահը:
«Երբ ներկայացրի Արդարադատության նախարարության վերահսկողության բաժնի որոշումը, որ ապրիլին կայացած համագումարը անվավեր է, դատավորը զարմացավ: Նա երևի չգիտեր, որ Արդարադատության նախարարությունը այդպիսի որոշում է ընդունել: Այդ փաստաթուղթը կցվեց իմ գործերին: Ինձ խնդրեցին` հաջորդ նիստին տեղեկանք բերեմ, որ ես նախագահ եմ: Ո՞ւմից բերեմ: Ասես` ծնողական ժողով լինի: Հաջորդ նիստին ես հակընդդեմ հայց պետք է ներկայացնեմ և վերջ: Ես դատավորին ասացի` եթե Գագիկ Աղաջանյանն է նախագահը, ապա ինչու երկու ամիս է, Աբովյան 16-ի վարձը չի մուծում, մրցումներ չի անցկացնում: Տրամաբանությունից դուրս բան է: Գագիկ Աղաջանյանը ոչ միայն ինձ է դատի տվել, այլ նաև Արդարադատության նախարարության գրանցումների բաժնին»,- «Առաջին լրատվական»-ի հետ զրույցում նշեց Մկրտիչ Փիլթոյանը:
Իսկ այս պարագայում ամենաաբսուրդն այն է, որ գործով վերջին նիստում դատարանը որոշել է, որ Մկրտիչ Փիլթոյանը չի կարող գործով որպես կողմ ներգրավված մնալ, քանի որ որևէ առնչություն չունի ֆեդերացիայի հետ: Դատարանը հայտարարել է, որ ֆեդերացիայի նախագահը Գագիկ Աղաջանյանն է, իսկ ֆեդերացիան համագումարի հետ կապված փաստարկներ ներկայացնելու համար այլ մարդ պետք է ուղարկի դատարան: Դատարանը հայտարարել է, թե Արդարադատության նախարարության վերահսկողության բաժնի որոշումը, որով ապրիլին կայացած համագումարը անվավեր է ճանաչված, կասեցված է: Այնպես որ, Փիլթոյանի խոսքով` Աղաջանյանն այժմ իրեն լիարժեք համարում է ֆեդերացիայի նախագահ և ամեն տեղ հայտարարում է այդ մասին և նույնիսկ անցել է անձնական վիրավորանքների:
«Նրանք ոչինչ չեն ուզում՝ բացի ֆեդերացիան խլելուց: Նա ինձ վարկաբեկում է, իսկ ես նրան դեռևս չեմ հեռացնում ֆեդերացիայից, որովհետև ես այդ կալիբրի մարդ չեմ: Ամեն ինչն ինձ մոտ է` գրանցման վկայականը, կնիքը…»,- ասում է Փիլթոյանը:
Նշենք, որ այս պահին նա իր փաստաբանի հետ դիմել է վարչական դատարան, որտեղ պատրաստվում է վիճարկել Արդարադատության նախարարության վերահսկողության բաժնի որոշման վավեր կամ անվավեր լինելը: Այնպես որ Փիլթոյանը հույս ունի, որ գոնե մինչ վարչական դատարանի կողմից որոշման վերաբերյալ վճիռ կայացնելը, կենտրոնի դատարանը չի շարունակի գործի քննությունը:
