Աստրախանում Ռուսաստանի նախագահ Դմիտրի Մեդվեդեւի միջնորդությամբ տեղի է ունեցել Ադրբեջանի եւ Հայաստանի նախագահներ Իլհամ Ալիեւի եւ Սերժ Սարգսյանի հանդիպումը` Ղարաբաղյան հարցի վերաբերյալ: Այս մասին գրում է ռուսական Коммерсант թերթը:
Այս հանդիպումն արդեն երրորդն էր այս տարի: Ինչպես եւ նախորդ երեք հանդիպումներում, գլխավոր թեման Ղարաբաղն էր, որը վերջին մի քանի տարիների ընթացքում դարձել է երեք երկրների նախագահների քննարկումների անսպառ աղբյուր: Պատահական չէ, որ սա արդեն 7-րդ հանդիպումն է երեք նախագահների միջեւ` սկսած 2008թ.-ից:
Մոսկվայում այս հանդիպման հետ կապված մեծ հույսեր չեն ունեցել: Ի վերջո, ռուս բանակցողների սպասելիքներն իրականացան. ոչ մի փաստաթուղթ չստորագրվեց, իսկ պարոնայք Ալիեւն ու Սարգսյանը, որոնց Մեդվեդեւը նավով ման տվեց Վոլգա գետով, ֆիքսեցին իրենց դիրքորոշումները, որոնք բավականին հեռու են մեկը մյուսից:
Ինչպես գրում է թերթը, վերջին ինն ամիսների ընթացքում կողմերը ոչ մի նոր գաղափար առաջ չեն քաշել:
Այնուամենայնիվ, կողմերը համաձայնել են իրականացնել պատանդների եւ զոհված զինվորականների դիակների փոխանակում: Իսկ Ռուսաստանի համար երեկվա հանդիպումն ուներ, ամենաքիչը, մեկ դրական կողմ` վերջինս ամրագրեց հերթական անգամ հիմնական միջնորդի իր կարգավիճակը: Բանն այն է, որ անցած տարի բանակցային գործընթացին կրկին ակտիվ միացել էր Մինսկի խումբը, որի անդամ են նաեւ Ռուսաստանն ու Ֆրանսիան, եւ որն առանց Մեդվեդեւի մասնակցության Ալիեւի եւ Սարգսյանի երկու հանդիպում էր կազմակերպել: Իսկ հուլիսին տարածաշրջան էր այցելել Հիլարի Քլինթոնը, որը կրկին առաջարկել էր միջնորդություն ղարաբաղյան հիմնահարցում:
Այս ֆոնին ամռանը Ռուսաստանն էլ մի քանի քայլերի դիմեց, որոնք մերթ նյարդայնացնում էին Երեւանին, մերթ Բաքվին, քանի որ ռուսական կողմը համագործակցության տարբեր ֆորմատներ էր ձեւավորում երկու երկրների հետ` երկկողմ հարաբերությունների համատեքստում: Սակայն ըստ թերթի՝ երեկվա բանակցությունները ցույց տվեցին, որ Ռուսաստանի հանդեպ որեւէ խորքային բացասական երեւույթներ կողմերի մոտ չկա:
