ՀՀ-ում կա 1.19 մլն աշխատատեղ, որոնց մեծ մասը` մոտ 622 հազարը, ոչ ֆորմալ է (չգրանցված): Այս մասին ասվում է Ազգային վիճակագրական ծառայության այսօր հրապարակած «Ոչ ֆորմալ հատվածը և ոչ ֆորմալ զբաղվածությունը ՀՀ-ում, 2010» ազգային զեկույցում:
Այդ չգրանցված աշխատատեղերի մեծ մասը` մոտ 481 հազար աշխատատեղ, գյուղացիական տնտեսություններում է, այսինքն` օրենսդրության խախտում այստեղ չկա: Ոչ գյուղատնտեսական ոլորտի ոչ ֆորմալ աշխատատեղերի բացարձակ թիվը մոտ 141 հազար է: Դա կազմում է ոչ գյուղատնտեսական ոլորտի աշխատատեղերի (704.4 հազար) 20%-ը:
Ոչ գյուղատնտեսական ոլորտում ոչ ֆորմալ զբաղվածությունն առավել տարածված է շինարարությունում (34.2%), մանրածախ և մեծածախ առևտրում (26.9%) և մշակող արդյունաբերությունում (11.8%): Օրինակ՝ շինարարության ոլորտում աշխատատեղերի յուրաքանչյուր երրորդը գրանցված չէ: