«Ժառանգություն» կուսակցության պատգամավոր Զարուհի Փոստանջյանը վերջերս է վերադարձել Ստրասբուրգից՝ ԵԽԽՎ ամառային նստաշրջանից: Այսօր լրագրողների հետ հանդիպմանը «Ժառանգության» պատգամավորը հայտնեց, որ ամենից շատ կարևորում է Եվրոպայի խորհրդի իրավական կոմիտեի կողմից ներկայացված զեկույցը, որը վերաբերում էր ադրբեջանցի քաղբանտարկյալների վիճակին:
Զարուհի Փոստանջյանի խոսքով` ԵԽԽՎ ամառային նստաշրջանում առանձին քննարկման առարկա է եղել նաև Հայաստանում սեռական փոքրամասնությունների հանդեպ խտրական վերաբերմունքի հարցը, ինչը եվրոպացի գործիչների կողմից խիստ քննադատության է արժանացել: «Խոսքը վերաբերում է վերջերս Երևանում պայթեցված DIY ակումբին»,- պարզաբանեց նա:
Անդրադառնալով Սևանա լճից ջրի բաց թողնման վերաբերյալ որոշմանը՝ խորհրդարանականը նշեց, որ որոշումը ՀՀ կառավարության ապաշնորհ քաղաքականության հետևանք է:
Զարուհի Փոստանջյանը անդրադարձավ նաև Եվրոպական խորհրդի նախագահ Հերման վան Ռոմպոյի՝ ԱԺ-ում հայ խորհրդարանականների հետ բանավոր հարցուպատասխան չկազմակերպելու փաստին՝ նկատելով, որ եվրոպացի բարձրաստիճան պաշտոնյայի այցի օրակարգում նման շփում նախատեսված չէր, փոխարենը` հայ պատգամավորները հնարավորություն ունեին նրան հարցեր ուղղել գրավոր տարբերակով:
