Արմավիրի մարզի Արաքս գյուղում այս տարի ծիրանի բերքը բավականին շատ էր, իսկ որակով ծիրանը արտահանվեց պետությունից: Գյուղապետ Ռուբեն Կարապետյանն «Առաջին լրատվական»-ին ասաց, որ գյուղացին բողոքներ ունի՝ կապված գնի հետ, սակայն անցած տարվա կարկտահարության համեմատ՝ գոհ է բերքից: Ինչպես նշեց գյուղապետը, ընդամենը մեկ-երկու օր 400 դրամով հավաքեցին ծիրանը, հետո՝ 300, 250, 200 դրամով: Արտահանողները գյուղացու հետ գինը պայմանավորվում էին տեղում:
Բացի արտասահման տանելուց, համայնքից ծիրան է մթերել նաև «Նոյյան» գործարանը՝ 50 և 40 դրամով: Իսկ շուկայում ծիրանը գյուղացին վաճառել է 150-80 դրամով:
Գյուղապետը նշեց նաև, որ այս տարի շատ լավ է դեղձի բերքը. «Այս տարի այնքան դեղձ կա, որ հիմիկվանից վախենում եմ, որ չարտահանվելու դեպքում խնդիր կունենանք մթերման հետ կապված»:
Այն հարցին, թե վարկերի պայմաններում ինչպե՞ս է հասցնում գյուղացին լուծել իր խնդիրները, գյուղապետն ասաց, որ եթե կարկուտ չլինի, գյուղացին կաշխատի, չնայած հիմա բոլորը վարկերով են ապրում:
