Երեկ ամբողջ օրը լուծումների ակնկալիքներով լցված եգիպտացիները կրկին հիասթափվեցին: Ընդ որում, այս հիասթափությունն այսօր կրկին Կահիրեի և մյուս քաղաքների փողոցները կարող է վերածել նոր բախումների թատերաբեմի, ինչն էլ ավելի արյունալի հետևանքներ կարող է ունենալ, քան հունվարի 28-ին հաջորդած օրերին եղավ:
Ակնհայտ է, որ Եգիպտոսի նախագահի ուղերձն էլ ավելի է սրել իրավիճակը երկրում և ավելացրել անորոշությունը: Մուբարաքը ոչ թե փորձեց լուծումներ գտնել, այլ ավելի շատ հարցեր առաջացրեց: Նրա առաջ քաշած սահմանադրական բարեփոխումների, լիազորությունների փոխանցման, ժողովրդավարական ընտրություններ անցկացնելու թեզերը տպավորություն էին ստեղծում, որ 80-անց զառամյալ Մուբարաքը փորձում է հավատարիմ մնալ իր խոստմանը` «մնալ սեփական երկրում»: Այլ տրամաբանություն նրա գործողություններում չի դիտվում: Տրամաբանություն կլինի, եթե այսօր բանակը հայտարարի, որ աջակցում է Մուբարաքին և Սուլեյմանին: Բայց դա հղի է անկանխատեսելի հետևանքներով:
Թահրիր հրապարակում Մուբարաքի ելույթից հետո կոշիկներ էին վեր թռչում: Արևելքում դա դժգոհության և անարգանքի նշան է: Իսկ թե որքան են եգիպտացիները դժգոհ այս ամենից, կիմանանք ընդամենը մի քանի ժամից. ընդդիմությունը կոչ է արել ուրբաթօրյա աղոթքից հետո հեղեղել փողոցները և երթով գնալ դեպի Մուբարաքի նստավայր: Իրավիճակն այնքանով է վտանգավոր, որ ընդդիմությունն չունի առաջնորդ, որը կղեկավարեր նրա գործողությունները:
