Քիչ առաջ Եգիպտոսի նախագահ Հոսնի Մուբարաքը հանդես եկավ ուղերձով: Բոլորը սպասում էին, որ նա հրաժարականի մասին հայտարարություն կանի, սակայն ինչպես խոստացել էր «մեռնել այս երկրում», այնպես էլ հավատարիմ է մնում իր խոստմանը: Մուբարաքն իր երկար ու խճճված ելույթում խոսեց վերջին օրերի բախումների և դրանցով պայմանավորված իր կատարած քայլերի մասին:
Նա հայտնեց, որ Սահմանադրության մեջ առաջարկում է փոփոխություններ, որոնք թույլ են տալիս չեղյալ համարել 30 տարի շարունակ երկրում գործող արտակարգ դրությունը: Ինչպես նաև նշեց, որ փոխանցելու է իր լիազորությունների մի մասը փոխնախագահ Օմար Սուլեյմանին:
Մուբարաքը կրկին խոստացավ պատժել վերջին օրերի մեղավորներին, և որ զոհվածների արյունը երբեք չի մոռացվի:
Մուբարաքի խոսքին անմիջապես արձագանքել է հրապարակը, որը կրկին պահանջում է նրա հրաժարականը:
Ակնհայտ է, որ այս ելույթն էլ ավելի է խճճում իրավիճակը Եգիպտոսում և անորոշության նոր փուլ մտցնում: Հնարավոր է, որ այս գիշեր նոր, ավելի լուրջ բախումներ լինեն Եգիպտոսի քաղաքներում, քանի որ հարյուր հազարավոր մարդիկ այս պահին գտնվում են փողոցում:
