Քաղաքագետների միության նախագահ Հմայակ Հովհաննիսյանի կարծիքով, Աստրախանի եռակողմ հանդիպումը եւս մեկ անգամ ընդգծեց Ռուսաստանի դոմինանտ դերը Ղարաբաղյան հիմնահարցի կարգավորման գործընթացում. «Սա արդեն յոթերորդ նմանատիպ հանդիպումն է, որը Ռուսաստանի հովանու ներքո է կայանում: Եռակողմ ձեւաչափով հանդիպումներով Ռուսաստանը ընդգծում է իր առավելությունը, եւ դրանով փորձում է նաեւ ակնարկել, որ հետխորհրդային տարածքում բոլոր նմանատիպ խնդիրների կարգավորման հարցում ինքն ունի առավելություն մյուս միջազգային միջնորդների նկատմամբ»: Հովհաննիսյանի գնահատմամբ, այն համաձայնությունները, որոնք ձեռք են բերվել Աստրախանում, բովանդակային իմաստով ամբողջությամբ կբացահայտվեն Աստանայում կայանալիք ԵԱՀԿ գագաթնաժողովի ընթացքում. «Աստանայի հանդիպումը չափազանց կարեւոր է, քանզի ստամբուլյան գագաթնաժողովից հետո այս գագաթնաժողովը ամենաառանցքայինը պետք է լինի ղարաբաղյան հիմնահարցի միջնորդական մոտեցումների ճշգրտման համար»: Ակնկալիքները, որ Աստանայի գագաթնաժողովի ընթացքում ղարաբաղյան գործընթացի կարգավորման վերաբերյալ ճանապարհային քարտեզ կպատրաստվի, Հմայակ Հովհաննիսյանը միանգամայն հնարավոր տարբերակ է համարում. «Եթե չստորագրվի, ապա որոշակի մոտեցումներ կհստակեցվեն: Սակայն պետք չէ առանձնապես մեծ ակնկալիքներ ունենալ, որովհետեւ արդեն իսկ Մեդվեդեւի խոսքերից, թե գործընթացը դժվար է, եւ դեռ վաղ է խոսել արդյունքների մասին, պարզ է դառնում, որ Աստանայում ինչ-որ բեկում չի արձանագրվելու, պարզապես փորձ է արվելու նոր շունչ հաղորդելու բանակցային գործընթացին»: