Այսուհետ պետության կողմից ֆինանսավորվող բժշկական ծառայությունների մի մասը կարող է իրականացվել համավճարների սկզբունքով:
Համավճարը, ընդհանուր ձևակերպմամբ, բժշկական օգնություն և սպասարկում ստացողի կողմից իրականացված ուղղակի վճարումն է բժշկական ապրանքների կամ ծառայությունների այն արժեքի համար, որը ներառված չէ գնի մեջ, կամ բժշկական ծառայության իրական արժեքի և պետության կողմից սահմանված գնի տարբերությունն է, որը վճարվում է բուժօգնություն ստացողի կողմից:
Առողջապահության ֆինանսավորման համակարգում համավճարները միշտ ձևավորվում են այն դեպքում, երբ բժշկական ծառայությունների կամ բուժման գներն ավելի ցածր են, քան իրական ծախսերը:
ԱՆ Պետական առողջապահական գործակալության պետ Արա Տեր-Գրիգորյանը, անդրադառնալով համավճարի համակարգին, նշեց, որ համավճարի չափը սահմանելու ժամանակ քննարկել և ուսումնասիրել են թե՛ վճարունակության խնդիրը, թե՛ շուկայում գործող գները.
«Դրա համար Երևան քաղաքում տարբերակված վճարի չափ է սահմանվել, մարզերում նույնպես սահմանված է այդ գինը: Մարզերում մինչև 80 հազար դրամ համավճար, Երևան մինչև 50 հազար դրամ համավճար:
Պետությունը սահմանված գին է վճարում` 105 հազար դրամ:
Կան դեպքեր, որոնք ամենաբարդն են, օրինակ բազմակի վնասվածքներն ամբողջությամբ ազատվում են համավճարից: Այն գները, որոնք պետք է գործեն հիվանդանոցներում, պետք է լինեն ավելի ցածր, քան այն գները, որոնք գոյանում են համավճարի և պետական պատվերի գնից, որովհետև դրանք ավելի թեթև ձևեր պետք է լինեն, իսկ եթե ավելի բարդ ձևեր են, ապա դրանք պետական պատվեր են: Օրինակ` մարզերում օղակված-ճողվածքը բարդ դեպք է համարվում, քանի որ վիրահատության տևողությունը ավելի երկար է և ծախսատար է, բայց պլանային դեպքերն ավելի թեթև են: Համավճարի այս ողջ գործընթացը խնդիր ուներ ստվերի վերացման, որը կար ու կա ինչպես պետական պատվերի մեջ, այնպես էլ վճարովի ծառայություններում»:
«Համավճարի հիմնական նպատակն այն է, որ այն գումարները, որ նախկինում վճարվում էր բժշկին, այսօր պետք է վճարվի դրամարկղ: Այս բարեփոխման շրջանակներում պետությունը իր ֆինանսական միջոցները տվյալ հիվանդներին չի նվազեցրել, ընդհակառակը պետական վճարումը յուրաքանչյուր հիվանդի համար բարձրացել է:
Այն սոցիալական խմբերը, որոնք արտոնություն ունեին անվճար բուժօգնություն ստանալու, այդ խմբերի ցուցակը չի կրճատվել: Այս մասով պետությունը իր պարտականությունները կատարում է և ոչ մի բան չի սահմանափակել»,-նշեց ԱՆ աշխատակազմի նորանշանակ ղեկավար Սուրեն Քրմոյանը: