Մոսկվա մեկնելուց առաջ Ճապոնիայի արտաքին գործերի նախարար Սեյձի Մաեհարան մամուլի ասուլիսի ժամանակ արել է մի շարք հայտարարություններ, որոնք կդժվարացնեն նրա բանակցությունները ռուս գործընկերների հետ:
Նա ասել է, որ Կուրիլները, միջազգային օրենսդրության համաձայն, պատկանում են Ճապոնիային, և այդ առումով օրենքն իրենց կողմն է: Միաժամանակ նա բաց չի թողել հնարավորությունը` հայտարարելու, որ այդուհանդերձ, ռուս-ճապոնական համագործակցության մեծ հնարավորություններ կան: Այս մասին հաղորդում է gazeta.ru կայքը:
«Որքան էլ որ ռուս պաշտոնյաները մեկնեն այնտեղ, որքան էլ որ ավելացնեն այնտեղ իրենց ռազմական ներկայությունը, դա չի կարող փոխել միջազգային օրենսդրության հետևությունները այն մասին, որ հյուսիսային տարածքները մեր երկրի պապենական հողերն են: Մենք այս հարցում անդրդվելի ենք»,- նշել է Մաեհարան:
Վերջին օրերին «փոխհրաձգությունը» երկու կողմերի միջև սաստկացել է: Մի քանի օր առաջ Ճապոնիայում այրվել էր ռուսական դրոշը, Ճապոնիայի վարչապետը խոսել էր Ռուսաստանի նախագահի` Կուրիլներ կատարած այցի անթույլատրելիության մասին, իսկ Մեդվեդևը խոստացել էր ավելացնել ռուսական ռազմական ներկայությունը Կուրիլներում ` «պաշտպանելու համար ռուսական տարածքները». այս մասին արդեն տեղեկացրել էր «Առաջին լրատվականը»: