«Ազատություն» ռադիոկայանը, հղում կատարելով Stratfor վերլուծական կենտրոնի զեկույցին, տեղեկացնում է, որ ըստ այդ զեկույցի՝ եգիպտական սցենարով Հայաստանի ներքաղաքական զարգացումները քիչ հավանական են.
«Հայաստանում լայնամաշտաբ բողոքի ակցիաների և անկարգությունների նախադրյալներ չկան, թեև Հայ ազգային կոնգրեսը, որը ղեկավարում է նախկին նախագահ Լևոն Տեր-Պետրոսյանը, ոգևորված Եգիպտոսում տեղի ունեցող իրադարձություններից, փետրվարի 18-ին մեծ հանրահավաք է հրավիրել»։
Stratfor-ի աղբյուրները վկայում են, որ 10 հազար մասնակիցների պարագայում ընդդիմությունը մեծ ոգևորություն կապրի: Բայց անգամ մի քանի հազար ցուցարարների մասնակցությունը այդ հանրահավաքին ընդդիմության կողմից կընկալվի որպես լուրջ հաջողություն` մղելով նրան հետագա գործողությունների,- նշում են ամերիկացի փորձագետները` պնդելով նաև, թե վերջին շրջանում հայաստանյան ընդդիմության ակցիաներին մի քանի հարյուր մարդ էր մասնակցում:
Սակայն միաժամանակ նշվում է, որ «ընդդիմության բողոքի ակցիաները առաջիկա ժամանակաշրջանի առանցքային իրադարձություններն են լինելու և արժանի են լուրջ դիտարկման»: Զեկույցի հեղինակը նաև ավելացնում է, որ «այնուհանդերձ, իշխանությունների հետ պայքարի առումով Հայաստանի ընդդիմության կարողությունները շարունակում են սահմանափակ մնալ, այդ իսկ պատճառով Հայաստանը խնդրահարույց երկրների շարքում ամենաքիչ ռիսկայինն է»:
Ըստ Stratfor-ի` կան մի քանի պետություններ, որտեղ այդ սցենարը հավանական է` Ղրղզստան, Ադրբեջան, Տաջիկստան: Ինչպես նշվում է զեկույցում՝ «Ադրբեջանի կառավարությունը ճնշման էր ենթարկվում դեռ Եգիպտոսի իրադարձություններից առաջ: Պատճառը միջնակարգ դպրոցներում գլխաշոր կրելու արգելքն էր, որը հավատացյալների շրջանում լուրջ դժգոհություն առաջացրեց: Բացի այդ, առկա կրոնական խնդիրներից փորձում են օգտվել Ադրբեջանի հարևան պետությունները, մասնավորապես` Իրանը»:
