Ինչպես NBC հեռուստաալիքին հայտնել է ԱՄՆ նախագահ Բարաք Օբամայի կինը` Միշելը, նա թույլ չի տալիս իր դուստրերին` Մալիին և Սաշային, օգտվել աշխարհի ամենահայտնի կայքերից մեկից` Facebook սոցիալական ցանցից:
«Ես կողմ չեմ, որպեսզի Facebook-ից օգտվեն փոքր երեխաները: Դա այն չէ, ինչ իրենց պետք է: Հիմա նրանք դրա կարիքը չունեն»,- ասել է ԱՄՆ առաջին տիկինը: Նա նաև նշել է, որ անվտանգության ծառայության կողմից էլ որոշակի պահանջներ են ներկայացվում երեխաների անվտանգությունն ապահովելու առումով: Բացի այդ, 12-ամյա Մալին և 9-ամյա Սաշան չեն էլ կարող դրանից օգտվել, քանի որ Facebook-ում կա տարիքային սահմանափակում` 13 տարեկանից նոր կարելի է օգտվել դրանից:
Թեպետ նա նշել է, որ Facebook-ից օգտվելու որոշումն, ի վերջո, կլինի իր երեխաներինը, սակայն միաժամանակ ասել է, որ երեխաները կսկսեն դրանից օգտվել հավանաբար միայն այն ժամանակ, երբ իրենք կլքեն Սպիտակ տունը: Միշելը նաև ասել է, որ Սպիտակ տնից միշտ խելացի երեխաներ են դուրս եկել, և իրենք պատրաստվում են շարունակել այդ ավանդույթը:
NBC հեռուստաալիքի հաղորդմամբ, Միշելին այս հարցում «աջակից են» նաև ամերիկացիների մի զգալի մասը` մոտ 43%-ը, որոնք կարծում են, որ երեխաները մանուկ հասակում չպետք է օգտվեն Facebook-ից, իսկ գրանցվելու տարիք պետք է սահմանվի 15-ը:
