Ինչպե՞ս է վերաբերվում մշակութաբան Արա Նեդոլյանը Եվրոպայի խորհրդի Այլատյացության և անհանդուրժողականության դեմ պայքարի հանձնաժողովի հրապարակած զեկույցին, որում մտահոգություն է արտահայտվում, որ հայ հանրությունը կասկածանքով է մոտենում նոր եկեղեցիների ստեղծման փորձերին:
«Առաջին լրատվականը» Արա Նեդոլյանի ուշադրությունը հրավիրեց ԵԽ փորձագետի դիտարկման վրա, որ Ազգային անվտանգության ծառայությունն իր ուշադրության ներքո է պահում նորաստեղծ եկեղեցիների գործունեությունը, և որ Գյումրիում Ավետարանչական եկեղեցու ներկայացուցիչներին հրավիրել էին «զրույցի»:
«Այդ զեկույցը վստահություն է ներշնչում այն առումով, որ կրոնական փոքրամասնությունների նկատմամբ անհանդուրժողականությունը կար նախկինում, և այս առումով իրավիճակը չի փոխվել: Իսկ դա անընդունելի է ժողովրդավար պետության համար, որը պարտավոր է հարգել խղճի և դավանանքի ազատությունը: Մեզ մոտ շարունակվում է պահպանվել հետադիմական բնույթի ճնշումը, պարտադրանքը ինչպես Հայ առաքելական եկեղեցու, այնպես էլ` կեղծ ազգայնական կազմակերպությունների կողմից»,- մեր զրույցի ժամանակ նշեց Արա Նեդոլյանը:
Նա հիշեցնում է, թե ինչպես են ժամանակին ճնշումների և բռնությունների ենթարկվել Եհովայի վկաները, հիսունականները: Ինչ վերաբերում է ԱԱԾ գործունեությանը, ապա Արա Նեդոլյանը կարծում է, որ այս կառույցն ուղղակի խախտում է Սահմանադրությունը և ինքնագլուխ խմբագրում Սահմանադրության այն հոդվածը, համաձայն որի` Հայաստանում յուրաքանչյուր ոք ունի խղճի և դավանանքի ազատություն:
