Եվրոպայի խորհրդի Այլատյացության և անհանդուրժողականության դեմ պայքարի հանձնաժողովը հրապարակել է Հայաստանին վերաբերող հերթական զեկույցը, որում նշվում է, որ հայ հանրությունը կասկածանքով է մոտենում նոր եկեղեցիների ստեղծման փորձերին:
«Որոշ բողոքականների, ինչպես նաև` կրիշնայականների և Եհովայի վկաների գործունեությունը մամուլում հիմնականում լուսաբանվում է բացասական լույսի ներքո: Նրանց մեղադրում են «երկրի հոգևոր անվտանգությունը վտանգելու մեջ»,- նշված է զեկույցում: «Առաջին լրատվականը» Հելսինկյան ընկերակցության նախագահ Միքայել Դանիելյանից հետաքրքրվեց, թե որքանով է զեկույցի անդրադարձը համապատասխանում իրականությանը:
«Լիովին համամիտ եմ»,-մեր հարցին այսպես արձագանքեց Միքայել Դանիելյանը: Մեր զրույցի ժամանակ իրավապաշտպանը կարծիք հայտնեց, որ Հայաստանում թե՛ կրոնական, թե՛ սեռական փոքրամասնությունների նկատմամբ նկատելի է անհանդուրժողականության աճ, և իշխանությունները որևէ քայլ չեն անում այդ անհանդուրժողականությունը մեղմելու ուղղությամբ:
«Ես կարծում եմ, որ զեկույցը նույնիսկ մեղմ է»,- ասաց նա: Ինչ վերաբերում է Երևանի տարբեր փողոցներում հենասյուներին և պատերին փակցված «Ո՛չ աղանդներին» վերտառությամբ թռուցիկներին, ապա Միքայել Դանիելյանը դրանք որակեց որպես անտրամաբանական քայլեր: