Այսօր Ռուսաստանի նախագահ Դմիտրի Մեդվեդևը հայտարարել է Կուրիլյան կղզիները ժամանակակից զինատեսակներով ապահովելու մասին: Այս հայտարարությունը նա արել է երկրի պաշտպանության նախարար Անատոլի Սերդյուկովի հետ հանդիպման ժամանակ: Այս մասին գրում է «Էխո ՄՈսկվի» ռադիոկայանի կայքը:
«Բոլորը պետք է հասկանան, որ Կուրիլյան կղզիները Ռուսաստանի տարածքն են: Զինատեսակները, որ այնտեղ պետք է տեղակայաված լինեն, պետք է անհրաժեշտ, բավարար և ժամանակակից լինեն, որպեսզի ապահովվի այդ տարածքների` որպես Ռուսաստանի Դաշնության անբաժանելի մասի անվտանգությունը»,- հայտարարել է Մեդվեդևը: Միաժամանակ Մեդվեդևը կոչ է արել հարևան երկրներին միանալ կղզիների զարգացման ծրագրին:
Ակնհայտ է, որ այս քայլը հետևել է երկու օր առաջ Ճապոնիայի մայրաքաղաքում հակառուսական բողոքի ակցիաներին, ինչպես նաև երկրի ղեկավարի` Մեդվեդևին ուղղված հայտարարություններին:
Հիշեցնենք, որ Ճապոնիայի վարչապետն աններելի վիրավորանք էր անվանել Մեդվեդևի այցը Կուրիլյան կղզիներ, որոնք տասնամյակներ շարունակ վիճելի տարածք են համարվում երկու երկրների համար: Իսկ ակցիաների ժամանակ էլ պղծվել էր Ռուսաստանի դրոշը: