Հայաստանի ազգային օլիմպիական կոմիտեի նախագահ (ՀԱՕԿ) Գագիկ Ծառուկյանը 700 հազար դոլար է խոստացել յուրաքանչյուր այն մարզիկին, ով օլիմպիական ոսկի կնվաճի Լոնդոնում:
Պետական պարգևավճար է սահմանել նաև Հայաստանի կառավարությունը` 20-ական միլիոն դրամ` ոսկե, 15-ական միլիոն դրամ` արծաթե, և 10-ական միլիոն դրամ` բրոնզե մեդալակիրների համար:
ՀԱՕԿ-ի փոխնախագահը, լոնդոնյան խաղերում Հայաստանի պատվիրակության հանձնակատար Դերենիկ Գաբրիելյանը միանգամայն իրատեսական է համարում, որ Հայաստանն այս խաղերում նոր օլիմպիական չեմպիոն կունենա:
Անուններ տալ, սակայն, Գաբրիելյանը խուսափեց. – «Հիմա եթե ես ազգանուն տամ, ինչ-որ տեղ ինչ-որ մարզիկի կարող եմ հոգեբանական սթրեսի մեջ գցել: Այսօր ես այդ իրավունքը չունեմ»:
Նախորդ` Պեկինի օլիմպիադայում հայ մարզիկները նվաճեցին 6 բրոնզե մեդալ, և այս անգամ ՀԱՕԿ-ը գերխնդիր է դրել փոխել մեդալների գույնը:
Հայաստանի հավաքականի կազմը չի ընդլայնվել. այս օլիմպիադային էլ կմեկնեն 25 մարզիկներ` բայց նախորդ 8-ի փոխարեն հանդես կգան 10 մարզաձեւերում:
Հիմնական հույսերը կապված են Հայաստանի համար արդեն ավանդական դարձած մարզաձեւերում` ծանրամարտ եւ ըմբշամարտ:
Նախապատրաստական աշխատանքներին հատկացվել է 180 միլիոն դրամ: Բացման արարողությանը Հայաստանի պետական դրոշը կկրի հայ աշխարհահռչակ մարմնամարզիկ Ալբերտ Ազարյանը: Այս մասին տեղեկացնում է Azatutyun.am-ը: