«Թեև այսօր Հայաստանի ՀՆԱ-ի 80 %-ը ձեւավորվում է մասնավոր հատվածում, սակայն պետական կառավարման համակարգում ներգրավված են 17 նախարարություններ, 11 կառավարությանն առընթեր մարմիններ եւ ՀՀ սահմանադրությամբ չսահմանված, փաստորեն, անօրինական 4 իբրեւ թե անկախ հանձնաժողովներ, որոնց պահպանման վրա պետության կողմից կատարվում են հսկայական անարդյունավետ ծախսեր»,- առաջին լրատվականի հետ զրույցում ասյօր նշեց տնտեսագետ Մովսես Արիստակեսյանը:
«Այսպես, եթե 1990 թ. Պետական կառավարման համակարգում զբաղված էին 17,000 մարդ եւ դրանց պահպանման վրա պետական բյուջեից հատկացվող միջոցները կազմում էին ընդհանուր ծախսերի 1,43%-ը, ապա 2011 թ. համար 16,640 զբաղվածների պահպանման համար նախատեսվում է ավելի քան155 մլրդ դրամ կամ պետական բյուջեի ծախսերի 15.6 %-ը»,- նշեց Մ. Արիստակեսյանը:
Նրա խոսքով` 2011թ. Բյուջեի նախագծում 1000 ծառայողական ավտոմեքենաներից յուրաքանչյուրի պահպանման ծախսերը ծրարագրավորվել են շուրջ 2,8 մլն դրամի կամ 8000 դոլարի չափով: «Փաստորեն 1 ծառայողական մեքենայի պահպանման ծախսերը հավասարազոր են 9 կենսաթոշակառուին տրվող տարեկան բյուջետային ծախսերին: Այդ մեքենաների թվի կիսով չափ կրճատմամաբ կարելի էր հոգալ շուրջ 5000 թոշակառուների տարեկան ծախսերը կամ էլ էապես բարձրացնել ընտանեկան նպաստների բազային չափը, ինչը չկարողացավ իրականացնել կառավարությունը»,- ասաց տնտեսագետը: