Աստրախանյան հանդիպումն ու դրանից հետո Մեդվեդեւի հայտարարությունները ոչ միանշանակ արձագանք են գտել Ղարաբաղում. մի կողմից` դրական, մյուս կողմից` ոչ այնքան: Ղարաբաղի արտաքին քաղաքականության եւ անվտանգության հարցերով հանրային խորհրդի նախագահ, ԼՂՀ ԱԳ նախկին փոխնախարար Մասիս Մայիլյանը մեզ հետ զրույցում հայտարարեց, թե Աստրախանում կայացած նախագահների եռակողմ հանդիպումը կարելի է համարել հաջողված: «Կողմերին հաջողվել է համաձայնեցնել համատեղ հայտարարություն եւ պայմանավորվել ռազմագերիների փոխադարձ ազատ արձակման շուրջ: Շփման գծում դիպուկահարների ակտիվության աճի եւ փոխադարձ մեղադրանքների ֆոնին` ինքնին հանդիպման եւ նաեւ մարդասիրական բնույթի պայմանավորվածության ձեռքբերումը ընդունակ է որոշ չափով թուլացնել շփման գծում առկա լարվածության մակարդակը», – հայտարարեց Մայիլյանը:
Միաժամանակ նախկին փոխարտգործնախարարը որոշակի վերապահումներով է մոտենում Ռուսաստանի նախագահի այն հայտարարությանը, թե մեկ ամիս անց, Աստանայում կայանալիք ԵԱՀԿ նախագահների գագաթնաժողովի ժամանակ հնարավոր կլինի ինչ-որ համաձայնության հասնել հակամարտության կարգավորման սկզբունքների շուրջ: Մայիլյանը ուշադրություն է հրավիրում այն հանգամանքի վրա, որ հենց Մեդվեդեւի խոսքից էլ երեւում է, որ ինքը լիովին վստահ չէ, որ մեկ ամսվա ընթացքում նման համաձայնություն կարող է ձեռք բերվել, առավել եւս, եթե խոսքը գնում է բանակցային սեղանին դրված Մադրիդյան փաստաթղթի մասին, որի տարրերը ԵԱՀԿ Մինսկի խմբի համանախագահ երկրների նախագահների կողմից հրապարկվել են թե՛ իտալական Աքվիլայում, թե՛ հետո` Կանադայում: «Եթե խոսքն այդ սկզբունքների մասին է, ապա ես ինքս դեմ եմ դրանց, միաժամանակ նաեւ հոռետեսությամբ եմ տրամադրված այն հարցին, թե կողմերին կհաջողվի համաձայնության գալ, այն էլ` մեկ ամսվա ընթացքում, քանի որ հակամարտության երեք կողմերից առնվազն երկուսի (Հայաստանի եւ Ղարաբաղի) հասարակությունները, ինչպես նաեւ Ղարաբաղի քաղաքական ուժերը դեմ են այդ սկզբունքներին, որովհետեւ գիտակցում են, որ դրանք կյանքի կոչելու դեպքում կարող է վտանգվել Ղարաբաղի եւ նաեւ Հայաստանի անվտանգությունը», – նշեց Մայիլյանը: Նախկին փոխարտգործնախարարի խոսքով, քանի որ հայկական երկու հանրապետությունների հասարակությունները դեմ են այդ սկզբունքներին, ուստիեւ ինքը չի հավատում, որ Հայաստանի որեւէ նախագահ կարող է համաձայնություն տալ այդ սկզբունքների շուրջ, քանի որ նման համաձայնության արդյունքները կարող են անկանխատեսելի լինել: «Բայց ես, ամեն դեպքում, չեմ հավատում, որ Աստանայում կարող է նման համաձայնություն ձեռք բերվել», – ասում է Մայիլյանը: Նրա խոսքով, Հայաստանն ու Ղարաբաղը իրենց համաձայնությունը կարող են տալ միայն այն դեպքում, եթե վերանայվեն Մադրիդյան սկզբունքները եւ առաջարկվեն նոր սկզբունքներ, որոնք հաշվի կառնեն միջազգային իրավունքում առկա վերջին զարգացումները եւ մասնավորապես Կոսովոյի անկախության մասին ՄԱԿ-ի միջազգային դատարանի որոշումը:
