Այսօր Կիպրոսի Լիմասոլ քաղաքի «Ցիրիոն» մարզադաշտում Հայաստանի հավաքականը պարտություն կրեց Վրաստանի հավաքականից: Հանդիպումը սկսվեց վրացի ֆուտբոլիստների բուռն գրոհներով, ինչը 21-րդ րոպեին տվեց իր արդյունքը. Ալեքսանդր Իաշվիլին Գևորգ Կասպարովից արագ հասավ գնդակին` 0:1:
12 րոպե անց Սիրիաձեն կրկնապատկեց հաշիվը. Անանիձեն առանց որևէ դիմադրության հանդիպելու ներխուժեց տուգանային հրապարակ, փոխանցում կատարեց Իաշվիլիին, վերջինիս հարվածից հետո Արարատ Առաքելյանը դարպասային գծի վրայից գնդակը դուրս բերեց ուղիղ Սիրիձեի ոտքին, ով գրավեց անպաշտպան դարպասը` 0:2: Եվ միայն բաց թողած երկրորդ գնդակից հետո հայ ֆուտբոլիստները նախաձեռնությունը վերցրին իրենց ձեռքն ու մի քանի վտանգավոր գրոհ կազմակերպեցին, սակայն ամեն անգամ վերջին հարվածը չէր ստացվում: Առաջին խաղակեսն այդպես էլ ավարտվեց:
Երկրոդ խաղակեսը առաջինի ավարտի տրամաբանական շարունակությունն էր. Հայաստանի հավաքականը կրկին գրոհում էր, և կրկին չկար եզրափակող հարվածը: Յուրա Մովսիսյանի բացակայությունն ակնհայտ էր: 64-րդ րոպեին Կվիրկվելիան սեփական տուգանային հրապարակում կանոնները խախտեց Գևորգ Ղազարյանի նկատմամբ և մրցավարը նշանակեց 11-մետրանոց հարված: Էդգար Մանուչարյանի հարվածը դիպուկ էր` 1:2:
Հանդիպման մնացած ժամանակը կրկին անցավ Հայաստանի հավաքականի գրոհների ներքո, դրվագներից մեկում Մխիթարյանի հարվածից հետո հրաշալի գործեց վրացի դարպասապահը:
Ինչ խոսք, կարելի էր ավելի լավ խաղալ և ավելի լավ արդյունքի հասնել, բայց եթե հաշվի ենք առնում, որ Հայաստանի հավաքականն իր առաջին հանդիպումն էր անցկացնում 2011 թ. և խաղում էր առանց իր հարձակման ընդգծված առաջատարի, ապա չի կարելի այս պարտությունից ողբերգություն սարքել:
Վրաստանի հավաքական՝ 1. Գեորգի Լորիա, 2. Լաշա Սալուկվաձե, 3. Ակակի Խուբուտիա, 4. Կախա Քալաձե, 5. Լևան Կոբիաշվիլի, 6. Մուրթազ Դաուշվիլի, 7. Զուրաբ Խիզանիշվիլի, 10. Գոգիտա Գոգուա, 8. Ժանո Անանիձե, 9. Ալեքսանդր Իաշվիլի, 11. Դավիդ Սիրաձե։
Պահեստայիններ՝ 12. Նուկրի Ռևիշվիլի, 3. Գուրամ Կաշիա, 4. Ալեքսանդր Ամիսուլաշվիլի, 5. Ջաբա Կանկավա, Դավիդ Կվիրկվելիա, Գիորգի Մերեբաշվիլի։
Հայաստանի հավաքական՝ 1. Գևորգ Կասպարով, 4. Սարգիս Հովսեփյան, 2. Լևոն Հայրապետյան, 15. Հրայր Մկոյան, 6. Արարատ Առաքելյան, 17. Արտակ Եդիգարյան, 18. Հենրիխ Մխիթարյան, 10. Գևորգ Ղազարյան, 9. Էդգար Մալաքյան, 8. Մարկոս Պիզզելի,13. Էդգար Մանուչարյան:
Պահեստայիններ՝ Ստեփան Ղազարյան, Արտակ Ալեքսանյան, Արթուր Յուսպաշյան, Արթուր Եդիգարյան, Հովհաննես Համբարձումյան։