«Երբ «ԳԱԼԱ»-ի և իշխանությունների առճակատումը շատ խորացավ, իշխանությունները որոշեցին պատժել մեզ, որպեսզի մեր օրինակը դաս լինի մյուս լրատվամիջոցների համար»,- կարծում է Գյումրիի անկախ հեռուստատեսային ալիքի տնօրեն Կարինե Հարությունյանը:
Հիշեցնենք, որ «ԳԱԼԱ»-ն ի թիվս այլ հեռուստատեսությունների, ՀՌԱՀ որոշմամբ չստացավ հեռարձակման լիցենզիա:
Ըստ «Լրատվամիջոցներ. ինչպես աշխատել նեղ պայմաններում» քննարկման բանախոս «Անալիտիկոն» հանդեսի գլխավոր խմբագիր Գեղամ Բաղդասարյանի` տպագիր պարբերականները ավելի անկախ են իշխանության ազդեցությունից, սակայն այստեղ էլ կան բազում խնդիրներ։ Բաղդասարյանի գնահատմամբ, դրանք հետևյալն են. «Նախ թերթը կախված չէ լսարանից։ Թերթը չի գոյատևում լսարանի հաշվին, ուստի լսարանը չի թելադրում նրա ոճը, բովանդակությունը։ Երկրորդ խնդիրն այն է, որ լրատվությունը չի դարձել բիզնես։ Եվ երրորդը` չկա անկախ մամուլի ինստիտուտ»։
Ըստ «Սիվիլիթասի» վերլուծաբան Թաթուլ Հակոբյանի` այժմ իշխանությունները փորձում են վերահսկել մամուլի գործունեությունը` նրանց դեմ դատական գործ հարուցելով և ֆինանսական պատասխանատվության ենթարկելով։
«Ժամանակը թելադրում է գրաքննության նոր ձևեր, դրանից է նաև թերթերին դատի տալն ու ֆինանսական ճնշում գործադրելը։ «Հայկական ժամանակի», «Ժամանակի» դատերը նմանօրինակ գրաքննության վառ օրինակներն են»,- մատնանշում է Գեղամ Բաղդասարյանը։
Նա բնական է համարում իշխանությունների նման քայլերի դիմելը` մամուլի գործունեությունը վերահսկելու համար, սակայն հորդորում է լրատվամիջոցներին չզիջել նման ճնշումներին, քանզի դա կարող է լինել «վերջին մեխը անկախ մամուլի դագաղին»։
