Այսօր Ազգային ժողովի և կառավարության հետ հարց ու պատասխանի ընթացքում «Ժառանգություն» խմբակցության պատգամավոր Անահիտ Բախշյանը առողջապահության նախարար Հարություն Քուշկյանին գրավոր հարց էր ուղարկել, թե նախընտրական շրջանում ինչ նպատակներով և գումարներով է իրականացվում բժշկական բարեգործական ծրագիրը, ինչին ի պատասխան նախարարը նշեց, որ բժշկական բարեգործական ակցիան իրականացվել է միշտ և ժողովրդի սոցիալական վիճակից ելնելով, իսկ ֆինանսավորումը կատարվում է «Էրեբունի» հիվանդանոցի կողմից, այսինքն` իր:
ՀՅԴ խմբակցության պատգամավոր Արծվիկ Մինասյանը հարց ուղղեց վարչապետին, բայց նրան պատասխանեց փոխվարչապետ Արմեն Գևորգյանը: Արծվիկ Մինասյանը անդրադարձավ Իջևան համայնքում տեղական ինքնակառավարման, հատկապես ավագանու գործունեությանը վերաբերող խնդրին, ըստ որի` 2007 թվականից ավագանիները լիազորություններ չեն իրականացնում, որի մասով կա նաև դատավճիռ: Փոխվարչապետը նշեց, որ 13 ավագանիներից 5-ի լիազորությունները կասեցվել են, իսկ երեքն էլ հրաժարականի դիմում են ներկայացրել: Այժմ արդարադատության նախարարության հետ աշխատանքներ են տարվում, թե ինչպես կարելի է օրենքը շրջանցել և արտահերթ ընտրություններ անցկացնել: