Ռոման Աբրամովիչի Millhouse ընկերությունը բանակցություններ է սկսել աշխարհի խոշորագույն հանքարդյունաբերական BHP Billiton կորպորացիայի հետ` Չուկոտկայում ոսկու ու պղնձի արդյունահանում սկսելու ուղղությամբ: Այս մասին գրում է «Կոմերսանտը»` հղում կատարելով անանուն աղբյուրներին:
Բանակցություններում խոսքը Բաիմյան հրապարակի մասին է, որը համարվում է ոսկու ու պղնձի խոշորագույն հանքավայրը Ռուսաստանում:
Հրապարակության տվյալով` գործարքը կարող է մինչև տարեվերջ կնքվել: Ենթադրվում է, որ BHP Billiton-ը կստանա համատեղ ձեռնարկությունում բաժնետոմսերի շուրջ 75 տոկոսը, իսկ 25 տոկոսը կմնա Millhouse-ի կառույցում:
Արդյունքում` Աբրամովիչի ընկերությունը կստանա շուրջ 1 մլրդ դոլար, որից 350 մլն դոլարը կստանա գործարքի կնքումից անմիջապես հետո, մյուս մասը` ավելի ուշ տրանշների միջոցով:
Առայժմ անգլոավստրալական BHP Billiton-ը ակտիվներ չունի Ռուսաստանում:
Millhouse-ը 2008թ. 25 տարով ստացել է Բաիմյան հրապարակի լիցենզիան: Ոչ պաշտոնական տվյալների համաձայն` Millhouse-ն արդեն ներդրել է 100 մլն դոլար:
