«Առաջին լրատվական»-ը նախկին դաշնակցական, այժմ` «Ժառանգություն» կուսակցության փոխնախագահ Ռուբեն Հակոբյանից հետաքրքրվեց, թե 1998 թ. և 2003 թ., երբ Դաշնակցությունը սատարում էր Ռոբերտ Քոչարյանին, ինչի շնորհիվ էլ նա դարձավ ՀՀ նախագահ, չէ՞ր մտածում, որ Լեռնային Ղարաբաղի նախագահին Հայաստան բերելով՝ թուլացնում են Լեռնային Ղարաբաղի դիրքերը բանակցություններում: Ինչո՞ւ է Ռուբեն Հակոբյանն այսօր բարձրաձայնում այդ մասին:
Ռուբեն Հակոբյանն ասաց, որ այն ժամանակ էլ ինքը եղել է այն կարծիքին, որ ԼՂ նախագահին ՀՀ վարչապետ նշանակելը թուլացնում է Լեռնային Ղարաբաղի դիրքերը միջազգային դիվանագիտական ասպարեզում: Եվ դա, ըստ Ռ. Հակոբյանի, եղել է իրենց կուսակցության դիրքորոշումը:
«Կարող եք ընթերցել այն ժամանակվա մամուլը և համոզվել»,- խորհուրդ տվեց նա: Թե ինչու Դաշնակցությունը հետագայում պաշտպանեց Ռոբերտ Քոչարյանի թեկնածությունը ՀՀ նախագահի ընտրություններում, Ռուբեն Հակոբյանը դա բացատրեց «այն ժամանակ տեղի ունեցող պրոցեսով, որն իր կարգավորելու շրջանակներից դուրս էր»:
Հետո էլ հավելեց, որ, եթե չլիներ Մարտի 1-ը, Ռոբերտ Քոչարյանի նկատմամբ մոտեցումները, թերևս, այդպիսին չլինեին:
«Առաջին լրատվական»-ը հետաքրքրվեց նաև, թե ինչպես է պատահել, որ բարոյականությունից խոսող և Ռոբերտ Քոչարյանի ձևավորած մաֆիոզ, կոռումպացված խորհրդարանը քննադատող Ռուբեն Հակոբյանը նախկինում համաձայնել է նույն Ռոբերտ Քոչարյանի իշխանության օրոք հյուպատոս աշխատել Սանկտ Պետերբուրգում:
«Ես դիվանագիտական աշխատանքի եմ անցել 2000 թվականից: Գլխավոր հյուպատոսը ներկայացնում է տվյալ տարածաշրջանում պետության, հայ ժողովրդի, հայ քաղաքացու շահերը, զբաղվում է տնտեսական և մշակութային համագործակցությամբ: Կարծում եմ` հասկանալի է քաղաքական հարցերի շրջանակը. ներքաղաքական հարցերին ես չեմ անդրադառնում: Այդ ընթացքում ես սառեցրել էի իմ կուսակցական գործունեությունը»,- մեր հարցին այսպես պատասխանեց նախկին դաշնակցական գործիչը:
Հետո նա հավելեց, որ իրեն հյուպատոս է նշանակել ՀՀ արտգործնախարարը, ինքը մինչ այդ եղել է Ազգային ժողովի պատգամավոր, և իրեն Ռոբերտ Քոչարյանը չի ընտրել: