Ֆրանսիայում լուրջ սկանդալ է հասունանում: Ֆրանսիական լրատվամիջոցները պարզել են, որ Ֆրանսիայի վարչապետ Ֆրանսուա Ֆիյոնը և արտաքին գործերի նախարար Միշել Ալիոն-Մարին իրենց արձակուրդներն անցկացրել են մասամբ նաև Եգիպտոսի և Թունիսի ռեժիմների հաշվին:
Պարզվել է, որ Ֆրանսիայի վարչապետը Եգիպտոսով ճամփորդել է Հոսնի Մուբարաքի տրամադրած ինքնաթիռով, իսկ արտաքին գործերի նախարարը` Թունիսի դիկտատոր Զին Ալ-Աբիդին բեն Ալիի մերձավոր գործարարներից մեկի ինքնաթիռով:
Այս մասին հայտնում է Euronews-ը: Ֆիյոնն ու Ալիոն-Մարին արդեն հաստատել են, որ օգտվել են նրանց փոխադրամիջոցներից: Դրանից հետո Նիկոլա Սարոկզին խորհուրդ է տվել իր նախարարներին այսուհետ հանգստանալ Ֆրանսիայում:
«Օտարերկրացիների կողմից առաջարկված այսօրինակ տարբերակները պետք է այսուհետ ստանան վարչապետի կամ նախագահական նստավայրի համաձայնությունը»,- նշել է Սարկոզին:
Տեղեկացնենք նաև, որ վերջերս բրիտանական մամուլում հայտնվել էին լուրեր, որոնց համաձայն, Եգիպտոսի բախումներից հետո ԱՄՆ նախագահի հատուկ ներկայացուցիչ է նշանակվել նախկին դիվանագետ Ֆրենկ Վիսները։ Վերջինս այս պահին աշխատում է մասնավոր մի ընկերությունում, որը Հոսնի Մուբարաքի կառավարության հետ վերջերս մի քանի խոշոր պայմանագիր է ստորագրել: