Միավորված կոմկուսի նախագահ Յուրի Մանուկյանը առաջարկում է, որպեսզի հայաստանյան բոլոր երեք կոմունիստական կուսակցությունները մասնակցեն խորհրդարանական ընտրություններին միասնական ցուցակով:
«Առաջին անգամ եմ ես նման առաջարկություն անում: Ես բազմիցս առաջարկել եմ, որ կոմունիստական կուսակցությունները միավորվեն, սակայն եթե դա հնարավոր չէ, պետք է գոնե ընտրություններին միասին մասնակցենք»,- ասում է Մանուկյանը:
Միավորված կոմկուսի նախագահը ընդունում է, որ ընտրություններին մենակ մասնակցելու ներուժ չունի, ուստի կուսակցությունների չմիավորվելու դեպքում ընտրություններին չի մասնակցի:
Յուրի Մանուկյանը միավորվելու կոչ է անում նաև Հայաստանում գործող բոլոր սոցիալիստական կուսակցություններին. այս միավորման կազմակերպչի դերում Մանուկյանը տեսնում է ՀՅԴ-ին:
«Դաշնակցությունը պարտավոր է շփումներ սկսել հայաստանյան 30-ից ավելի սոցիալիստական կուսակցությունների հետ: Ի վերջո, բոլոր երկրները գալիս են սոցիալիզմի: Մենք էլ դրան կգանք մի օր»,- համոզված է Մանուկյանը: