Շատ հավանական է, որ առաջիկայում շաբաթ օրը ԱԺ-ի որոշմամբ համարվի աշխատանքային օր: Նման առաջարկով այսօր Ազգային ժողովում հանդես եկավ Aշխատանքի և սոցիալական հարցերի մշտական հանձնաժողովի նախագահ Հակոբ Հակոբյանը: Նա նաև նշեց, որ աշխատանքային օրենսգիրքը սահմանում է, թե ինչպես պետք է աշխատել:
Նրա խոսքերով, եթե բոլոր գործարանները աշխատեն ժամը 8-00-ից, կոմունիկացիոն խնդիրներ կառաջանան։ «Տարբեր գործարաններ տարբեր գրաֆիկով պետք է աշխատեն,որպեսզի կոմունիկացիոն խնդիրներ չառաջանան»,- նշեց Հակոբ Հակոբյանը և ավելացրեց, որ ՀՀ քաղաքացիները օրենքով շաբաթը 48 ժամ աշխատելու իրավունք ունեն, իսկ արտաժամյա աշխատանքը ենթակա է հավելյալ վճարման:
Այժմ ԱԺ-ում քննարկվում է Հակոբ Հակոբյանի փոփոխությունների փաթեթը:
ՀՅԴ խմբակցության պատգամավոր Արծվիկ Մինասյանը, արձագանքելով Հակոբ Հակոբյանի առաջարկած 5-օրյա աշխատանքային շաբաթը 6-օրյակով փոխարինելու փաթեթին, հարցրեց, թե որտեղի՞ց է եկել այդ փոփոխությունների անհրաժեշտությունը, իրենց աշխատասենյակների՞ց, թե՞ հասարակության պահանջից: Նա նաև ավելացրեց, որ ինքը քաղաքացիների կողմից բողոքներ ստանում է, բայց ոչ թե օրենսգրքից, այլ իրենցից և կառավարությունից:
Արծվիկ Մինասյանը ավելացրեց, որ եթե աշխատանքային ռեժիմը փոխվի վեցօրյակի,ապա պետք է լրացուցիչ աշխատանքային ուժեր ընդգրկվեն:
Հակոբ Հակոբյանը նշեց, որ օրենքի փոփոխությունը ծագել է գործարարների հետ հանդիպումից հետո։ Հովիկ Աբրահամյանը միջամտեց և առաջարկեց այդ հարցերը քննարկել իրենց աշխատասենյակներում: Արծվիկ Մինասյանը ասաց, որ օրենքի փոփոխությունը ԱԺ գործարարները փորձում են իրենց օգտին շահարկել և աշխատողներին շահագործել: