Հունիսի 26-ին ԱԺ ՀՀԿ խմբակցության ղեկավար Գալուստ Սահակյանը, խմբակցության անդամներ Արտակ Զաքարյանը և Մնացական Մնացականյանը հանդիպել են ֆրանսիական Բուրգ լե Վալանս քաղաքի պատվիրակությանը, որը ղեկավարում է այդ քաղաքի Միավորման կոմիտեի նախագահ Ժան-Պիեռ Սանդոզը:
Գալուստ Սահակյանը բարձր է գնահատել հայ-ֆրանսիական համագործակցության ներկա մակարդակը, որը, նրա բնորոշմամբ, համապետական ակտիվ հարաբերություններից վերածվել է երկու ժողովուրդների անկեղծ բարեկամության: ՀՀԿ խմբակցության ղեկավարը գոհունակություն է հայտնել, որ միջպետական հարաբերություններն ավելի ու ավելի են խորանում հատկապես տարածաշրջանային համագործակցության ասպարեզում իրականացվող իրատեսական քայլերով:
ԱԺ պատգամավոր Մնացական Մնացականյանը տեղեկացրել է, որ Բուրգ լե Վալանսը և Թալինը քույր քաղաքներ են, և իր` Թալինի քաղաքապետ եղած տարիներին ֆրանսիացիները երկարատև զարգացման լուրջ ծրագրեր են իրականացրել Թալինում հատկապես սպասարկման ոլորտում: Այդ համագործակցությունն այսօր էլ շարունակվում է:
Ժան-Պիեռ Սանդոզը նույնպես կարևորել է հայ-ֆրանսիական հարաբերությունների զարգացումը և Ֆրանսիայում, մասնավորապես Բուրգ լե Վալանսում հայկական համայնքի ակտիվ դերակատարությունը տեղական ինքնակառավարման մարմինների աշխատանքներում` այդ ակտիվությամբ պայմանավորելով նաև Հայաստանի համայնքների, մասնավորապես` Թալինի հետ սերտ համագործակցությունը:
ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ հանդիպման ժամանակ քննարկվել են հայ-ֆրանսիական տարածաշրջանային կապերի զարգացմանը, նոր ծրագրերի իրականացմանը և այդ համատեքստում ՀՀ Ազգային ժողովի հնարավոր աջակցությանն առնչվող հարցեր:
