«Ինչպես ճիշտ օգտագործել անտառի հնարավորությունները» ծրագրի մասին այսօր լրագրողների հետ հանդիպման ժամանակ խոսեց «Բնության հարստությունը սերունդներին» ՀԿ նախագահ Ռուբեն Շախկյանը.
«Ծրագիրը, որը ես ներկայացնում եմ, իր բուն գործը կսկսի մայիս ամսից: Աշխատանքը պետք է սկսվի դպրոցներից, բակերից: Դպրոցները պետք է ունենան բուսաբանական լաբորիատորիաներ, գյուղամիջյան ճանապարհները նույնպես պետք է կանաչապատվեն: Գազի թանկացման հետ կապված ակտիվացել է փայտօգտագործման գործընթացը: Պետք է ծրագիր ունենանք, որ կտրված ծառերի փոխարեն տնկվեն նորերը»:
Բանախոսը նշեց, որ դպրոցականների հետ պետք է աշխատանքներ տարվեն, որ երեխաներն իրենք հասկանան և գնահատեն կանաչ տարածքների պահպանումն ու ճիշտ օգտագործումը. «Հայաստանում կան ծառատեսակներ, որոնք ոչնչացման եզրին են և գրանցված են «Կարմիր գրքում», օրինակ արջակաղնին, որը հատուկ տեսակի ծառ է»:
Վերջին վիճակագրական տվյալների համաձայն, մեր սակավահողության պայմաններում Հայաստանում կա 38% վարելահող, որը չի մշակվում և չի օգտագործվում։ «Բնության հարստությունը սերունդներին» հկ նախագահն առաջարկում է, որպեսզի ճիշտ օգտագործվի այն ամենը, ինչ բնությունը տվել է մեզ.
«Մենք այսօր այնպիսի ծառատեսակներ ունենք, որ աշխարհահռչակ կահույքագործական կազմակերպություններ պատրաստ են վճարել ցանկացած գումար, որպեսզի ձեռք բերեն այդ ծառատեսակի մշակված փայտը: Օրինակ՝ մեր հաճարենու համար ռումինական հայտնի կահույքագործական կազմակերպություններից մեկը պատրաստ է վճարել այն գումարը, որը մենք կասենք, սակայն նրանք պահանջում են միջազգային ստանդարտներին համապատասխան փայտ: Մեզ անհրաժեշտ են լավ սղոցարաններ»:
Ռուբեն Շախկյանի առաջարկած ծրագրի մասին տեղյակ են բնապահպանության, գյուղատնտեսության, կրթության և գիտության նախարարությունները, ծրագրին աջակցում է Հանրային խորհուրդը: Ծրագրի առավելություններից մեկն այն է, որ ֆինանսական մեծ ներդրումներ չի պահանջում: