Վերջին շրջանում ԱՄՆ-ին շատ են մեղադրում այն բանի համար, որ հստակ դիրքորոշում չի արտահայտում Եգիպտոսի դեպքերի վերաբերյալ: Ավելին, փորձագետները կարծիք են հայտնում, որ ԱՄՆ վարչակազմը փորձում է առժամանակ հետաձգել Մուբարաքի հեռացումը` ստեղծված իրավիճակում կողմնորոշվելու համար:
Սակայն Միացյալ Նահանգները փորձում է շտկել այս իրավիճակը և ճնշումներ բանեցնել Եգիպտոսի իշխանությունների վրա: Երեկ ԱՄՆ փոխնախագահ Ջո Բայդենը Եգիպտոսի փոխնախագահ Օմար Սուլեյմանին ներկայացրել է իշխանության փոխանցման «ճանապարհային քարտեզ», որը նախատեսում է 30 տարի շարունակ գործող արտակարգ դրության վերացում, ինչպես նաև ցուցարարների և լրագրողների դեմ բռնարարքների դադարեցում: Ըստ BBC-ի` Օմար Սուլեյմանը հայտարարել է, որ Եգիպտոսն այս պահին պատրաստ չէ ժողովրդավարության:
Երեկ Կահիերի փողոցները կրկին մարդաշատ են եղել: Նույն BBC-ի հաղորդմամբ` Կահիրեում նման մարդաշատ հանրահավաք չէր եղել հունվարի 25-ից հետո, երբ սկսել էին բողոքի ակցիաները: Ցուցարարների պահանջը շարունակում է մնալ մեկը` իրենք լքում են փողոցները միայն այն ժամանակ, երբ հրաժարական է տալիս Հոսնի Մուբարաքը: Ակնհայտ է, որ այս հակամարտությունը պետք է հանգուցալուծվի, քանի որ Եգիպտոսի տնտեսությունը կարող է երկար չդիմակայել: Կորուստներն ամենօրյա ցույցերից կազմում են հարյուր միլիոնավոր եվրոներ:
Երեկ ցույցերին մասնակել է նաև Google-ի տարածաշրջանային բաժնի ղեկավար Վայիլ Գոնիմը, որը մի քանի օր շարունակ գտնվում էր եգիպտական բանտում: Նա մեղադրվում էր ցույցերը կազմակերպելու մեջ և ազատ է արձակվել միայն այն բանից հետո, երբ նրա համար միջնորդել է եգիպտացի ազդեցիկ գործարարներից մեկը:
Մի քանի շաբաթ շարունակ եգիպտական մամուլում կարծիքներ էին հնչում, որ ցուցարար երիտասարդներն իրենց առաջնորդները չունեն: Հիմա երիտասարդները կարծես թե առաջ են մղում Գոնիմին, որին առաջարկում են որպես իշխանությունների հետ բանակցություններում իրենց միակ ներկայացուցիչ: