Ինչպես «Առաջին լրատվականը» այսօր ավելի վաղ տեղեկացրել էր, Русский Репортер-ը հրապարակել է WikiLeaks-ի` Երևանում ամերիկյան դեսպանատան հերթական փաստաթուղթը, որտեղ ԱՄՆ դեսպան Մարի Յովանովիչը, պատմելով Հայաստանում քրեական «ռազբորկաների» մասին, Հայաստանում Ուկրաինայի դեսպանի վրա հարձակումը կապել է Հայաստանի կառավարության և դեսպանի միջև եղած հակասությունների հետ:
«Դեսպանը պատրաստվում էր հոկտեմբերի 20-ին Երևանում անցկացնել Հոլոդոմորի հետ կապված միջոցառում, ինչին Հայաստանի կառավարությունը փորձել է խոչընդոտել և չեղյալ համարել: Բանն այն է, որ այդ օրը Հայաստան էր ժամանում Ռուսաստանի Դաշնության նախագահ Դմիտրի Մեդվեդևը, և Հոլոդոմորի միջոցառումը վատ կընդունվեր ռուսական կողմից: Դեսպանը ամերիկացիներին պատմել է, որ հոկտեմբերի 19-ին իրեն կանչել են արտաքին գործերի նախարարություն, որտեղ նախարարը հորդորել է դեսպանին չեղյալ համարել Հոլոդոմորի միջոցառումը: Դեսպանը հրաժարվել է դա անել, որից հետո նրա բացակայության ժամանակ ներխուժել են նրա բնակարան, ջարդուփշուր են արել շատ իրեր, սակայն շատ բան չեն հափշտակել: Դեսպանը հայտնել է նաև, որ սա, հավանաբար, իրեն վախեցնելու փորձ է եղել: Հոլոդոմորի հարգանքի միջոցառմանը ոչ մի պաշտոնատար անձ չի եկել, իսկ Հ1-ով ցուցադրված ռեպորտաժում այն անվանվել է «այլանդակ» և «կրկեսի նման»:
Ինչպե՞ս է մեկնաբանում Հայաստանի ԱԳՆ-ն այս տեղեկությունը` հարցրեցինք ԱԳՆ մամլո խոսնակ Տիգրան Բալայանին, ով պատասխանեց. «WikiLeaks-ի հրապարակումների մասով մեր վերաբերմունքը արտահայտվել է հանրապետության նախագահի խոսնակի կողմից` դեռ երկու ամիս առաջ»:
Հիշեցնենք, որ Սերժ Սարգսյանի խոսնակ Արմեն Արզումանյանը այս թեմայի շրջանակներում ասել է ընդամենը հետևյալը. «Ես ձեռնպահ եմ մնում այլ երկրի ներքին գաղտնի փաստաթղթերի վերաբերյալ մեկնաբանություններից»: